दाङमा थोक औषधि ब्यवसायी संघको पहलमा सस्तो दरमा बिक्री भइरहेको रेम्डिसिभिर बेच्न रोक लगाइएको छ । औषधि ब्यवस्था विभाग नेपालगञ्जले औषधि बिक्री भइरहेको मेडिकलमा छापा हानेर बिक्री गर्न रोक लगाएको हो । थोक औषधि ब्यवसायी संघ लुम्बिनीको समन्वयमा आएको यो औषधि कालिका मेडिकलबाट सरकारी दरभन्दा कम मूल्यमा बिक्री हुँदै आएको थियो ।
देशका बिभिन्न ठाउँमा यो औषधिको बिक्रीमा कालोबजारी भएपछि थोक औषधि ब्यवसायी संघको पहलमा दाङमा सरकारी दरभन्दा कममा औषधि बिक्री गर्न शुरु गरिएको थियो । निजी क्षेत्रले बिक्री गर्न नपाउने भन्दै विभागले रोकेको हो । तर, औषधि ब्यवसायीहरुले भने जिल्ला प्रशासन कार्यालयकै सिफारिसमा औषधि ल्याएर सामाजिक सेवाको भावनासहित नाफा नलिएर सरकारले तोेकेको भन्दा कम मूल्यमा बिक्री गरेको बताएका छन् ।
थोक औषधि ब्यवसायी संघका अध्यक्ष शालिकराम आचार्यले आफूहरुको सेवाभावलाई गलत ढंगले हेरिएको बताउनुभयो । ‘जनताको समस्या समाधानका लागि निजी सरकारी निकायबीच राम्रो कार्यका लागि साझेदारी गरेर अगाडि बढ्दा सबैलाई सहज हुने थियो भन्ने भावले हामी मिहिनेत र लगानीका लागि तयार भएका थियौं तर उल्टो देख्न थालिएछ । संकटको बेलामा आवश्यकताअनुसार कार्यनीतिमा सरलीकरण गर्नु राम्रो होला’–उहााले भन्नुभयो ।
यो घटनाको राजनीतिक रुपमा पनि बिरोध हुन शुरु भएको छ । यसैबीच नेकपा माओवादी केन्द्र दाङले विज्ञप्तिमार्फत बिक्री बन्द गरिएकोमा आपत्ति जनाएको छ । जिल्ला इञ्चार्ज जीवन गौतमले विज्ञप्ति जारी गरी कुनै नीतिगत समस्या भए द्रूत गतिबाट समाधान गर्न तर सहजरुपमा औषधि आपूर्तिको ब्यवस्था नरोक्न आग्रह गर्नुभएको छ । उहाँले दाङमा फेरि अक्सिजन आपूर्तिमा समस्या आएको भन्दै संघ र प्रदेश सरकारको पनि ध्यानाकर्षण गराउनुभएको छ ।
माओवादी केन्द्रको विज्ञप्तिको पूर्ण पाठः
कोरोना उपचारमा प्रयोग गरिदै आएको रेम्डिसिभिरको देशब्यापीरुपमा अभाव र कालोबजारी हुँदै आएको तथ्य सार्वजनिक भइसकेको छ । यसैक्रममा दाङमा औषधि ब्यवसायीहरुले आफ्नै पहलमा यो औषधि ल्याएर बिक्री गर्न थालेपछि नागरिकले सहजै औषधि पाउने अवस्था बनेको थियो ।
घोराहीमा राप्ती स्वास्थ्य विज्ञान प्रतिष्ठान र थोक औषधि ब्यवसायी संघमार्फत तथा तुलसीपुरमा राप्ती प्रादेशिक अस्पताल र राप्ती लाइफ केयर अस्पतालबाट बिक्री हुन थालेपछि दाङमा रेम्डिभिसिरको आपूर्ति सहज भएको थियो । तर, थोक औषधि ब्यवसायी संघमार्फत सस्तो दरमा बिक्री भइरहेको रेम्डिसिभिरको औषधि ब्यवस्था विभाग नेपालगञ्जले बन्द गरिदिएको घटनाप्रति हाम्रो पार्टीको गम्भीर ध्यानाकर्षण भएको छ ।
जिल्ला प्रशासन कार्यालय दाङको सिफारिसमा आएको सो औषधि बिक्रीमा रोक लगाउँदा नागरिक सहजै र सस्तो मूल्यमा औषधि पाउने अधिकारबाट वञ्चित भएका छन् भने कालोबजारी फष्टाउने खतरा पनि उत्तिकै बढेर गएको छ । सामाजिक सेवाको भावसहित सस्तोमा रेम्डिसिभिर बिक्री गर्ने ब्यवसायीहरुलाई हतोत्साहित गर्ने गरी औषधि ब्यवस्था विभागबाट भएको हस्तक्षेपको भ्रत्सना गर्दछौ। यो महामारीको बेलामा सरकारी, निजी क्षेत्रसहित सबैको समन्वय र सहकार्य जरुरी छ । कतै केही नीतिगत समस्या छन् भने द्रूत गतिबाट समाधान गरेर तत्काल रेम्डिसिभिर सहज र सस्तोदरमा बिक्री गर्ने वातावरण बनाउन सम्बन्धित निकायलाई आग्रह गर्दछौं ।
साथै दाङमा अझै अक्सिजन आपूर्ति सहज हुन नसकिरहेकोप्रति पनि संघ, प्रदेश र स्थानीय सरकारहरुको ध्यानाकर्षण गराउन चाहन्छु । नेपालगञ्जबाट हरेक २४ घण्टामा कम्तीमा दुई सय सिलिण्डर आउनु पर्नेमा त्यो परिमाण आधा घटेपछि पुनः अस्पतालहरुमा अक्सिजनको अभाव हुन थालेको छ । केही दिनअघि मात्रै अक्सिजनको अभावमा दाङमै धेरैले ज्यान गुमाउनुपरेको घटना फेरि दोहोरिन नदिन तत्काल आवश्यक अक्सिजन आपूर्तिका लागि संघ र प्रदेश सरकारलाई आग्रह गर्दछौं ।
जीवन गौतम
इञ्चार्ज
नेकपा माओवादी केन्द्र दाङ
यो पनि पढ्नुहोस्
दाङमा निजी क्षेत्रले ल्यायो रेम्डिसिभिर, सरकारी दरभन्दा कम मूल्यमै उपलब्ध गराइने
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
