रोल्पाका कृष्णबहादुर बोहराका काठमाडौंमा भएको हत्याको प्रहरीले अनुसन्धान सकेर अभियुक्तविरुद्ध जन्मकैदको माग दाबी गर्दै अनुसन्धान प्रतिवेदन सरकारी वकिल कार्यालयमा बुझाएको छ । महानगरीय प्रहरी परिसर काठमाडौंका अनुसार अनुसन्धान प्रतिवेदन काठमाडौं जिल्ला सरकारी वकिलको कार्यालयमा पेस गरेको छ ।
प्रतिवेदनमा रोल्पा रुन्टीगढीका ४५ वर्षीय कृष्णबहादुर बोहरा हत्याको मुख्य अभियुक्त चितवन शक्तिखोरकी ३७ वर्षीया कल्पना मुडभरी पौडेललाई मानिएको छ । कल्पनालाई जन्मकैदको र शव व्यवस्थापनका सहयोगी भनिएकी उनकी १५ वर्षीया छोरीलाई भने जन्मकैदको दुईतिहाइ कम सजाय माग गरिएको छ ।
मुलुकी अपराध संहिता ०७४ परिच्छेद ५ को दफा ४२ अनुसार जन्मकैद भन्नाले २५ वर्ष कैदजीवन बिताउनुपर्ने भनिएको छ । त्यसो हुँदा कसुर प्रमाणित भए अभियुक्त मुडभरीले २५ वर्ष कैद सजाय कटाउनुपर्नेछ । त्यस्तै उनकी १५ वर्षीया छोरीको हकमा उमेर पुगेको व्यक्तिलाई कानुनबमोजिम हुने सजायको दुईतिहाइ कम सजाय हुनेछ ।
प्रहरीले हत्यामा संलग्न कल्पनालाई २७ साउनमा चितवनबाट पक्राउ गरेको थियो । हत्या गरिएकै दिनको साँझ उनी १५ वर्षीया छोरी र १३ वर्षका छोरा लिएर एम्बुलेन्समा चितवनको शक्तिखोरस्थित माइती पुगेकी थिइन् । पक्राउपछि काठमाडौं ल्याइएकी उनीविरुद्ध प्रहरीले विस्तृत अनुसन्धान थालेको थियो । बयानमा उनले योजनाबद्ध ढंगले नै बोहराको हत्या गरेको स्वीकार गरेकी छिन् ।
बोहराको साउन २४ गते गोंगबुमा हत्या गरिएको थियो । राति कल्पनाको कोठामा दहीमा लट्ठ पार्ने औषधि खुवाएर बोहराको संवेदनशील अंगमा हथौडा प्रहार गरी हत्या गरिएको थियो । हत्यापछि टुक्रा पारेर झोलामा हालेर गणेशस्थाननजिक फालिएको अवस्थामा शव प्रहरीले भेटाएको थियो ।
बोहराले फेक आइडीमार्फत नग्न फोटो सामाजिक सञ्जालमा सेयर गरेको झोंकमा हत्या गरेको कल्पानाले स्वीकार गरेकी छन् । यो नगर्न भन्दै पटक–पटक उनले बोहरालाई भने पनि रोक्नुको सट्टा उल्टै ब्ल्याकमेलिङ गर्न थालेपछि हत्या गर्ने योजना बनाएको बयान उनले दिएकी छन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
