रुकुमपश्चिमको मुसीकोट नगरपालिका १० चुनमा वडा स्वास्थ्य चौकी स्थापना गरिएको छ ।
नगर र वडाको पहलमा स्वास्थ्य चौकी स्थापना गरिएको हो । चौकीबाट सेवा शुरुसमेत गरिएको छ ।
नगरपालिकाका प्रमुख देबीलाल गौतमले स्वास्थ्य चौकी उद्घाटन गर्नुभएको हो । सो क्रममा उहाँले सीमित स्रोत र जनशक्तिबाट शुरु गरिएको स्वास्थ्य चौकीलाई स्तरीय बनाउँदै लगिने बताउनुभयो । उहाँले सबै वडामा स्वास्थ्य चौकी स्थापनाका लागि पहल गर्ने पनि बताउनुभयो ।
आगामी साउनदेखि जनशक्ति बढाइने पनि उहाँले बताउनुभयो । उहाँले गाउँघर क्लिनिकका लागि तीन लाख रुपैयाँ बजेट छुट्याइएको र त्यसबाटै भवन बनाएर काम अघि बढाउन सुझाव दिनुभयो ।
उपप्रमुख प्रेमकुमारी सुनारले आधारभूत स्वास्थ्य नेपाली नागरिकको मौलिक हक भएकाले सेवा नपुगेका सबै ठाउँमा सेवा विस्तार गर्दै लगिने बताउनुभयो । उहाँले चुनावमा गरेका प्रतिबद्धता क्रमशः पूरा गर्दै लगिने पनि बताउनुभयो ।
वडा अध्यक्ष गोप्यश्वर केसीको अध्यक्षतामा भएको कार्यक्रममा नेकपाका प्रतिनिधि जीवन खड्का, कांग्रेस प्रतिनिधि महादेव खड्कालगायतले बोल्नुभएको थियो ।
स्वास्थ्य चौकी ब्यवस्थापन समिति सदस्य चुडामणि रोकायको स्वागत मन्तव्यबाट शुरु भएको कार्यक्रम सञ्चालन स्वास्थ्य चौकीका इञ्चार्ज डिल्लीराज बोहराले गर्नुभएको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
