सफलराम शुक्ल
बच्चा बिग्रे दोष सबै गुरुलाई,
कतिन्जेल थोपर्ने दोष सधैँ अरूलाई ?
गृहकार्य नगरे पनि दोषी उनै गुरु,
कक्षाभित्र नपढे पनि प्रश्न उतै सुरु ।
कम नम्बर आए पनि गुरुमाथि प्रश्न,
कुनै क्षण छैन उनलाई चैनसँग बस्न ।
अनुशासन हराए पनि दोष उनैलाई,
बारम्बार प्रश्न किन खारिएको सुनलाई ?
दोषी नजर, दोषी दर्शन, हामी सबैको पीडा,
गुरुबिन कहाँ चल्छ र समाजको बेडा ?
प्रश्न गरौँ आफैँलाई, चिनौँ आफैँलाई,
मनको मैलो सफा गर्दा हल्का हुन्छ सबैलाई ।
गुरु त अहिले बनेका छन् एक्ला बृहस्पति,
नयनमा आँसु राखी हेर्छिन् सरस्वती ।
विचार दिने, ज्योति छर्ने गुरु अलपत्र,
चेतनाको दियो बलोस् चाहना यत्रतत्र ।
-शिक्षक लिटिल एन्जल्स, हात्तीबन
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
