दाङ । नेपाली लोकसंगीतमा नयाँ स्वाद, मौलिकता र प्रयोगशीलताको पहिचान बनाउँदै आएका गायक प्रकाश दुतराज यसपटक पुनः फरक शैलीका साथ दर्शकमाझ प्रस्तुत भएका छन्। निर्देशक नवीन घर्ती मगरसँगको सहकार्यमा तयार गरिएको गीत ‘मनमाया’ छोटो समयमै अत्यधिक चर्चामा आउँदै मिलियन भ्युज पार गर्न सफल भएको छ।
‘मनकी रानी मनमाया, देख्दा मनै कस्तो भो, विपनीमै भेट्दा पनि सपनी जस्तो भो, आज मनको कुरा भन्न पर्नि भो, तिमीलाई मन पर्यो, आम्मै दिल बस्यो कसो गर्ने हो‘’ जस्ता शब्दहरूले सिंगारिएको यो गीतले प्रेमभावलाई सरल, आत्मीय र दर्शक–श्रोताको मन छुने ढंगले प्रस्तुत गरेको छ। गीतमा मेलिना राईको स्वरले मधुरता थपेको छ भने अडियोको रिदमिक पक्षमा चर्चित ब्यान्ड कुटुम्बसँगको सहकार्यले संगीतलाई अझ समृद्ध र आकर्षक बनाएको छ।
यस गीतको सबैभन्दा विशेष पक्ष भनेको यसको भिडियो पक्ष हो, जसले नेवारी समुदायको जीवनशैली, संस्कार र मौलिक संस्कृतिलाई जीवन्त रूपमा प्रस्तुत गरेको छ। काठ तथा माटोका भाँडा बनाउने परम्परागत सीपदेखि नेवा समुदायको ‘बेल विवाह’ संस्कारसम्मलाई समेटेर भिडियोले सांस्कृतिक विविधताको सुन्दर झल्को दिएको छ। यसअघि प्रायः पहाडी परिवेश र राउटे समुदायका कथाहरूमा केन्द्रित हुँदै आएका दुतराजले यसपटक नेवारी समुदायलाई मुख्य विषय बनाउँदै आफ्नो सिर्जनात्मक दायरा अझ फराकिलो बनाएका छन्।
भिडियोमा स्वयं प्रकाश दुतराजसँगै प्रशंसा रायमाझीको अभिनय देख्न सकिन्छ, जसले कथालाई जीवन्त र विश्वसनीय बनाएको छ। अभिनय, लोकेशन र दृश्य संयोजनले गीतको भावनालाई अझ प्रभावकारी ढंगले प्रस्तुत गरेको छ।
यसअघि ‘घर कता हो बैनीको’, ‘माया छैन र’, ‘राम साँइली’, ‘रेशम’, ‘रिमै’ र ‘मन भुल्छ’ जस्ता गीतहरूबाट ग्रामीण कथा, सामाजिक यथार्थ र लोकभावनालाई सशक्त रूपमा प्रस्तुत गर्दै आएका दुतराजका प्रायः सबै गीतहरू दर्शक–श्रोतामाझ लोकप्रिय रहँदै आएका छन्। ती गीतहरूले पनि मिलियन भ्युज पार गर्दै उनको लोकप्रियता थप मजबुत बनाएका छन्।
‘मनमाया’ गीत युट्युबमा मात्र होइन, सामाजिक सञ्जालहरू विशेषगरी टिकटकमा समेत अत्यधिक रुचाइएको छ। प्रयोगकर्ताहरूले गीतका अंशहरू प्रयोग गर्दै भिडियो निर्माण गर्ने, रिल्स तथा टिकटक बनाउने क्रम तीव्र रूपमा बढिरहेको छ, जसले गीतको पहुँच अझ व्यापक बनाएको छ।
समग्रमा, ‘मनमाया’ केवल एक प्रेमगीत मात्र नभई सांस्कृतिक प्रस्तुति, संगीतमा नवीन प्रयोग र दृश्य कथनको उत्कृष्ट संयोजन हो। यसले नेपाली संगीत क्षेत्रमा नयाँ सम्भावना र फरक धारको संकेत गर्दै दुतराजको कलाकारितालाई अझ उचाइमा पुर्याउने देखिन्छ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
