दाङ । नेपाली कांग्रेस दाङ क्षेत्र नम्बर–२ का प्रतिनिधिसभा सदस्य उम्मेदवार किरण किशोर घिमिरेले आइतबार घोराहीका विभिन्न वडामा व्यापक घरदैलो कार्यक्रम सम्पन्न गरेका छन् ।
घोराही–१४ को खोलीगाउँ, घोराही–१८ बासकोटी, घोराही–१५ रतनपुर तथा घोराही–९ लरैना टोलमा पुगेर उम्मेदवार घिमिरेले स्थानीय बासिन्दासँग प्रत्यक्ष भेटघाट गर्दै राष्ट्रिय राजनीति र स्थानीय विकासका समसामयिक विषयमा खुला छलफल गरेका हुन् । घरदैलोका क्रममा उनले घर–घर पुगेर आशीर्वाद लिँदै जनताको सुझाव, गुनासा र अपेक्षा सुनेका थिए।
कार्यक्रममा महासमिति सदस्य भुप बहादुर डाँगी, क्षेत्रीय सभापति भिम प्रकाश खड्का, क्षेत्र नम्बर–२ (क) का सभापति प्रकाश श्रेष्ठ तथा (ख) का सभापति बस्नेत लगायत नेताकार्यकर्ताको सक्रिय सहभागिता रहेको थियो । नेताहरूले आगामी निर्वाचनलाई परिवर्तन र स्थायित्वको अवसरका रूपमा लिनुपर्ने बताएका थिए।
उम्मेदवार घिमिरेले वर्तमान राष्ट्रिय बहस—संविधानको रक्षा, सुशासन, आर्थिक सुधार, राजनीतिक स्थायित्व र रोजगारी सिर्जना—लाई स्थानीय विकाससँग अभिन्न रूपमा जोडेर अघि बढाउनुपर्ने आवश्यकता औंल्याए । “संविधान कार्यान्वयन, पारदर्शिता र आर्थिक अनुशासन बिना विकास सम्भव छैन,” उनले भने, “राष्ट्रिय स्तरमा स्थायित्व आयो भने मात्र स्थानीय तहसम्म प्रभावकारी सेवा प्रवाह हुन्छ।”
उनले शिक्षा र स्वास्थ्य क्षेत्रको गुणस्तर सुधार, कृषि आधुनिकीकरण, सिंचाइ विस्तार, सडक स्तरोन्नति, सुरक्षित खानेपानी, बाढी नियन्त्रण तथा युवालाई स्वदेशमै रोजगारीका अवसर सिर्जना गर्ने विषयलाई प्राथमिकतामा राख्ने प्रतिबद्धता व्यक्त गरे । विशेष गरी दाङको कृषि सम्भावनालाई व्यावसायिक उत्पादन र बजारीकरणसँग जोड्न आवश्यक नीतिगत पहल गर्ने उनको भनाइ थियो।
घरदैलोका क्रममा स्थानीयवासीले सडक मर्मत तथा स्तरोन्नति, खानेपानीको दीर्घकालीन व्यवस्थापन, बेरोजगारी समस्या, कृषि उत्पादनको उचित मूल्य र बजार अभाव, साथै बाढी नियन्त्रणको दिगो योजना आवश्यक रहेको बताएका थिए ।
ती समस्यालाई नीति निर्माण र बजेट विनियोजनमार्फत समाधान गर्ने विश्वास दिलाउँदै घिमिरेले भने, “राष्ट्रिय स्तरमा सुशासन र स्थायित्व कायम नगरी स्थानीय विकास सम्भव हुँदैन। त्यसैले म संसदमा पुगेर दाङको आवाज बलियो रूपमा उठाउनेछु। यहाँका युवाको रोजगारी, किसानको उत्पादन र पूर्वाधार विकासलाई पहिलो प्राथमिकता दिनेछु।”
उनले विकासका कार्यक्रम कागजमा मात्र सीमित नराखी व्यवहारमा देखिने गरी कार्यान्वयन गर्ने प्रतिबद्धता जनाउँदै जनताको साथ, सुझाव र निगरानीलाई नै आफ्नो शक्ति मान्ने बताए ।
घरदैलो कार्यक्रमलाई स्थानीयले सकारात्मक रूपमा लिएको नेताकार्यकर्ताले बताएका छन्। निर्वाचन नजिकिँदै जाँदा घिमिरेले क्षेत्रका अन्य वडामा समेत भेटघाटलाई तीव्रता दिने कार्यक्रम रहेको जनाइएको छ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
