घोराही । पछिल्लो समय युवायुवतीहरूबीचको प्रेम सम्बन्ध टिकाउ नहुनु र धोका पाउनु सामान्यजस्तै विषय बनेको छ। सामाजिक सञ्जालको तीव्र प्रयोग, शीघ्र प्रभावित हुने मनोवृत्ति, जीवनशैलीमा आएको तीव्र परिवर्तन, र सम्बन्धप्रति बढ्दो असहिष्णुता यसका केही मूल कारण हुन्।
आजको पुस्ता स्वतन्त्रता र आत्मनिर्णयलाई प्राथमिकता दिन्छ। तर यही स्वतन्त्रताको आडमा कहिलेकाहीँ जिम्मेवारी र सहनशीलता हराउँदै जान्छ। सम्बन्ध भनेको केवल प्रेम मात्र नभई, समझदारी, समर्पण र धैर्यको समिश्रण हो भन्ने कुरा बिर्सनु पनि समस्या गहिरिँदै जानुको कारक हो।
धोका दिनु वा पाउनु सम्बन्धको अन्त्य मात्र होइन, आत्मविश्वासमा गहिरो चोट पुर्याउने घटना हो। अझ दुःखको कुरा के छ भने, बाध्यताले सम्बन्ध टुट्नु एउटा कुरा हो – जहाँ परिस्थितिहरूले दूरी बनाउँछन्। तर जानीजानी अरूको भावना, विश्वास र भरोसामाथि खेल्नु पूर्ण रूपमा गलत हो। यस्तो क्रियाकलाप केवल एक व्यक्तिको मात्र होइन, समाजको नै मानसिक स्वास्थ्यमा असर पार्ने खालको हुन्छ।
यस्तो व्यवहारले सम्बन्धप्रतिको विश्वास मर्ने मात्रै होइन, भविष्यमा अरु सम्बन्धहरू निर्माण गर्ने आधार पनि कमजोर पार्छ। धेरै युवायुवतीहरू यस्ता अनुभवपछि एक्लोपन, अविश्वास र नकारात्मक सोचमा फस्ने गरेका छन्।
सम्बन्धमा प्रवेश गर्नु स्वतन्त्रता हो, तर त्यसको मूल्य समझदारी र प्रतिबद्धता हो। एक अर्काप्रति इमानदारी, खुला संवाद, र विश्वासको जग बनाउनु दीर्घकालीन सम्बन्धका लागि आधारभूत शर्तहरू हुन्। साथै, परिवार र समाजले पनि सम्बन्धबारे यथार्थवादी दृष्टिकोण राख्दै युवाहरूसँग संवाद बढाउनु आवश्यक छ।
सम्बन्ध टुट्नुको पीडा गहिरो हुन्छ, तर त्यो टुटफुट नै सामान्य हुन थाल्दा समाजको मूल्य प्रणालीमै प्रश्न उठ्छ। त्यसैले, सम्बन्धलाई “चाहना” मात्र होइन, “प्रतिबद्धता” को रुपमा लिनु आजको आवश्यकताको विषय हो।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
