सुडान घोटाला काण्डमा भ्रष्टाचार गरेको अभियोगमा पूर्व महानिरीक्षक (आईजी) रमेशचन्द ठकुरीलाई कारागार चलान गरिएको छ।
दोषी ठहर भएपछि फरार रहँदै आएका ठकूरीले बिहीबार बिहान सर्वोच्च अदालतमा आत्समर्पण गरेका थिए।
उनलाई बिहीबारै बिहीबार डिल्लीबजार कारागार चलान गरिएको हो। मुद्दाको फैसलाउपर पुनः सुनुवाइको मागसहित ठकुरीले पुनरवलोकन निवेदन दर्ता गराएका छन्। उनले कारागारभित्रै रहेर पुनरावेदन गर्न पाउने भएका छन्।
सुडान घोटालाकाण्डमा भ्रष्टाचार गरेको ठहर गर्दै उनलाई सर्वोच्चले २०७४ बैसाख १७ गते १ वर्ष कैद र ४० हजार जरिवाना सुनाएको थियो। उनीसँगै सजाय सुनाइएका दुई पूर्वआईजीपीले त्यतिबेलै अदालतमा हाजिर भए पनि ठकुरी भने फरार रहँदै आएका थिए। अदालतको समय सकिनु एक दिनअघि देखि उनी फरार रहँदै आएका थिए।
ठकुरीसँगै सर्वोच्चले पूर्व आईजीपी ओमविक्रम राणालाई २ वर्ष कैद र ५० हजार जरिवाना, हेमबहादुर गुरुङलाई १ वर्ष कैद र ४० हजार जरिवाना सुनाएको थियो।
प्रधानन्यायाधीश सुशीला कार्की र न्यायाधीश विश्वम्भरप्रसाद श्रेष्ठको इजलाशले ठकुरीसहितका प्रहरी अधिकारीविरद्ध उक्त सजाय फैसाल गरेको हो। फैसला लगत्तै फरार रहेका उनी पहिले भरत र त्यसपछि थाइल्यान्ड गएर बसेका थिए।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
