रुकुम (पूर्व) जिल्ला प्रशासन कार्यालयको पहलमा एक जना घाइतेलाई हलिकप्टरबाट उद्धार गरिएको छ ।
पुथा उत्तरगंगा गाउँपालिका हिमपहिरोमा परेर घाइते भएका एक युवाको हेलिकप्टर मार्फत उद्धार गरिएको छ । पुथा उत्तरगंगा गाउँपालिका वडा ९, खाराबाङका १७ वर्षीय सुजन खड्कालाई उद्धार गरिएको जिल्ला प्रशासन कार्यालयले जनाएको छ ।
बुधबार आफ्नै गाउँबाट डोल्पाको दुनै जाने क्रममा पुथाउत्तरगंगा गाउँपालिका ९, लालपपाटनको हिउँसाङ नजिकै हिमपहिरोमा परेर खड्का घाइते भएको प्रमुख जिल्ला अधिकारी मित्रलाल शर्माले बताउनुभयो । ‘जिल्ला प्रशासन कार्यालय रुकुम पूर्वको पहलमा उहाँलाई बिहीबार उद्धार गरी थप उपचारको लागि नेपाली सेनाको हेलिकप्टरमार्फत पोखरा पठाइएको छ ।’
खड्कासँगै गएका अर्का एकजनाले हिमपहिरो स्थलबाट झण्डै ८ घण्टा हिँडेर उहाँको अवस्थाबारे गाउँलेलाई जानकारी गर्नुभएको थियो । स्थानीयले प्रमुख जिल्ला अधिकारीलाई खबर गरेलगत्तै हेलिकप्टरमार्फत उद्धार गरिएको थियो ।
खड्काको मणिपाल शिक्षण अस्पताल पोखरामा उपचार भइरहेको बताइएको छ । घटनास्थल रुकुमकोटबाट झण्डै ३ दिनको पैदल दूरीमा पर्दछ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
