राप्ती प्रादेशिक अस्पताल तुलसीपुरका मेडिकल सुपरिटेन्डेन्ट डा. विनोद सिंहमाथि नेकपा एमालेसम्बद्ध विद्यार्थीका नेताहरुले कालोमोसो दलेका छन् ।
डा. सिंहमाथि एमालेनिकट अखिलका जिल्ला अध्यक्ष सर्जन परियारलगायतले कालोमोसो दलेको अस्पताल ब्यवस्थापन समितिले जनाएको छ ।
ब्यवस्थापन समिति अध्यक्ष पदमप्रसाद न्यौपानेले विज्ञप्ति जारी गर्दै सर्जन परियार, दिवस क्षेत्री र गणेश खड्कालगायतले कालोमोसो दलेर अस्पतालबाट फरार भएको जानकारी दिनुभएको छ ।
साथै उहाँले २४ घण्टाभित्र पक्राउ गरी हदैसम्म कानूनी सजाय नभएमा अस्पतालबाट प्रदान गरिने सेवा बन्द गर्ने चेतावनी दिनुभएको छ ।
त्यस्तै चिकित्सक संघ दाङले पनि विज्ञप्ति जारी गर्दै २४ घण्टाभित्र दोषीलाई पक्राउ गरेर कारवाही नगरे आन्दोलनमा उत्रने चेतावनी दिएको छ ।
नेकपा माओवादी केन्द्र दाङलगायतका राजनीतिक दलहरुले पनि घटनाको बिरोध गर्दै दोषीमाथि तत्काल कारवाही गर्न आग्रह गरेका छन् ।
कर्मचारी संगठनको पनि बिरोध
त्यसैगरी नेपाल राष्ट्रिय कर्मचारी संगठनले पनि घटनाको बिरोध गरेको छ ।
आक्रमणकारीलाई कारवाही गरेका छौंः एमाले
एमाले दाङले दोषीहरु आफ्नो पार्टीनिकट विद्यार्थी संगठनका जिल्ला संयोजक र सहसंयोजक रहेका सर्जन परियार र दिवस क्षेत्रीलाई कारवाही गरेको जनाएको छ । जिल्ला संयोजक हुकुम बस्नेत र सचिव मनोहर बुढाथोकीले जारी गरेको विज्ञप्तिमा उनीहरुलाई संगठनको जिम्मेवारी र एमालेको साधारण सदस्य नरहने गरी कारवाही गरेको जानकारी दिनुभएको छ ।
आक्रमणमा हाम्रो समर्थन छः अनेरास्ववियू दाङ
एमालेले कारवाही गरेको बताए पनि विद्यार्थी संगठनका नेताहरुले आक्रमणमा आफ्नो समर्थन गरेको बताएका छन् । संगठनको तर्फबाट विज्ञप्ति जारी गर्दै उनीहरुले चिकित्सकमाथि भएको आक्रमणमा समर्थन जनाएका हुन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
