प्राबिधिक शिक्षा तथा ब्यवसायिक तालिम परिषद् (सिटीइभिटी)का उपाध्यक्ष खगेन्द्रप्रसाद अधिकारीसहितको टोलीले दाङको घोराहीस्थित सहिद कृष्णसेन इच्छुक नमूना बहुप्राबिधिक शिक्षालयको अनुगमन गरेको छ । सो टोलीले निर्माणाधीन भवनका साथै अन्य संरचनाको अवलोकन गर्दै शिक्षक विद्यार्थीसँग परामर्श पनि गरेको थियो ।
निरीक्षणपछि सिटीइभिटीका सदस्य सचिव पुष्परमण वाग्लेले स्थापनाकै छोटो समयमा पनि राम्रो प्रगतिको संभावना देखेर यो शिक्षालयमा नमूना कार्यक्रम लागु गरिएको बताउनुभयो । प्रदेशकै नमूना शिक्षालयको रुपमा स्थापित गर्न सुझाव दिंदै उहाँले प्रदेशको तालिम केन्द्रको रुपमा विकास गर्नुपर्ने बताउनुभयो ।
नमूना शिक्षालयको रुपमा भौतिक पूर्वाधार निर्माण भइरहेकाले आवश्यक सहयोग पनि गरिने उहाँले प्रतिबद्धता व्यक्त गर्नुभयो । ‘लर्निङ र अर्निङ’ (पढ्दै कमाउँदै) सँगसँगै अघि बढाउनुपर्नेमा जोड दिंदै उहाँले आफूले सिकेका कुरा समुदायमा पनि विस्तार गर्न विद्यार्थीहरुलाई आग्रह गर्नुभयो ।
शिक्षालयका प्रमुख यादव सुवेदीले कहिले भाडा त कहिले अन्य विद्यालयका भवन प्रयोग गर्दै दुःखजिलो गरी यहाँसम्म आइपुगेको जानकारी गराउँदै अहिले आफ्नो टेक्ने ठाउँसम्म भएकाले अझै सहयोगको आवश्यकता रहेको बताउनुभयो । उहाँले शिक्षालयलाई नमूना बनाउन तनमनका साथ लागिरहेको पनि बताउनुभयो ।
टोलीमा सिटीभिटीइका लुम्बिनी प्रदेश प्रमुख अरबिन्दनाथ चौधरी, परीक्षा उपनियन्त्रक दामोदर देवकोटा, प्रदेश लेखा अधिकृत कृष्ण टन्डनलगायत रहनुभएको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
