प्रायः सधैं धुर्मैलो र खिन्न देखिने घोराही १६ का अस्मित घर्तीमगर आज भने निकै चम्किलो र फ़ुर्तिलो देखिए । नयाँ पोशाक, नयाँ जुत्ता र नयाँ झोला बोकेर स्कुल पुग्दा उनी निकै फुरुङ्ग थिए । आर्थिक अवस्था कमजोर भएका कारण उनका बुवाआमाले उनलाई विद्यालय भर्ना गर्न सकेका थिएनन् । साथीहरुसंग स्कुल जान नपाउँदा अस्मित निकै उदास थिए ।
अब भने अस्मितको पढ्ने इच्छा पूरा भएको छ । समाजसेवी पदम केसीले उनलाई घोराही ६ फचकपुरस्थित आर्वर राइजिङ स्कूलमा भर्ना गरिदिएका छन् । उनले अस्मितलाई ड्रेस, झोला, जुत्ता सहित विद्यालयमा भर्ना शुल्क समेत तिरिदिएका हुन् । विद्यालयले भने मासिक शु:ल्क छूट गरिदिएको छ ।
अस्मितका बुवाआमा दुबै अपाङ्ग छन् । दुबैजना बोल्न सक्दैनन् । उनीहरुको आफ्नो घर समेत छैन । आफन्तको घरमा बसेका छन् । मजदूरी गर्नु बाहेक अरु कुनै उपाय छैन ।
“मलाई उनीहरुको अवस्थाले निकै चिन्तित बनायो । कमसेकम अस्मितको भविष्य बर्बाद नहोस् भनेर मैले उसलाई विद्यालय भर्ना गरिदिएको हुँ ।” समाजसेवी केसीले बताए । यस अघि पनि समाजसेवी केसीले उनको परिवारलाई एक थान सिलिन्डर र ग्यास चूल्हो प्रदान गरेका थिए । अस्मितको पढाइको चिन्ता गर्दै नेपाल पत्रकार महासंघका अध्यक्ष सबिन प्रियासनले आधा दर्जन कापी र पेन्सिल प्रदान गरेका छन् । विपतमा रहेका अस्मितको परिवारलाई उद्धार गर्न नेपाल पत्रकार महासंघ दाङका पूर्व अध्यक्ष केएल पीडितले पहल गरिरहेका छन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
