घोराही । दाङको घोराही उपमहानगरपालिका–१ हर्नकमा दोस्रो एचकेसिसी कप क्रिकेट प्रतियोगिता हुने भएको छ । हर्नक काउले क्रिकेट क्लबको आयोजनामा विजयादशमी तथा शुभ दीपावलीको अवसर पारेर यही कात्तिक १० गतेदेखि प्रतियोगिता सञ्चालन हुन लागेको हो ।
खेलाडीको विकास, प्रतिभावान् खेलाडीको पहिचान तथा छरिएर रहेका खेलाडीलाई एउटै मैदानमा उतार्ने उद्देश्यले प्रतियोगिता आयोजना गर्न लागिएको क्लबका अध्यक्ष क्षितिज खड्काले जानकारी दिनुभयो ।
अम्बिका माध्यमिक विद्यालयको खेलमैदानमा सञ्चालन हुने प्रतियोगितामा घोराही उपमहानगरपालिका–१ हर्नक, काउले तथा बंगलाचुली गाउँपालिकाका खेलाडीले मात्र सहभागिता जनाउन पाउने अध्यक्ष खड्काले बताउनुभयो ।
प्रतियोगितामा प्रथम हुने टोलीले नगद २० हजार रुपैयाँसहित कप, मेडल र प्रमाणपत्र प्राप्त गर्नेछ भने द्वितीय हुने टोलीले नगद १५ हजार रुपैयाँसहित कप, मेडल र प्रमाणपत्र प्राप्त गर्ने क्लबका सचिव लिलाधर खड्काले जानकारी दिनुभयो ।
त्यसैगरी प्रतियोगितामा उत्कृष्ट प्रदर्शन गर्ने खेलाडीलाई म्यान अफ द सिरिज, उत्कृष्ट बलर तथा उत्कृष्ट ब्याट्सम्यानलगायतका विधामा पनि पुरस्कृत गरिने सचिव खड्काले बताउनुभयो ।
प्रतियोगितामा सहभागी हुन इच्छुक टोलीले तीन हजार रुपैयाँ दर्ता शुल्क बुझाउनुपर्नेछ । टोली दर्ता गर्ने अन्तिम मिति कात्तिक ९ गतेसम्म तोकिएको आयोजकले जनाएको छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
