रुकुम पश्चिमको मुसिकोट नगरपालिका थर्पुस्थित प्रसिद्ध डिग्रे साईकुमारी भगवती मन्दिरमा लाग्ने ऐतिहासिक तथा धार्मिक महत्त्वको डिग्रे मेला आउनु एक महिना अघि नै चहलपहल बढ्न थालेको छ ।
मेला नजिकिएसँगै मन्दिरमा पूजाआजा तथा दर्शनका लागि आउने भक्तजनको सङ्ख्या बढ्दै गएको छ । देवीप्रतिको अटुट आस्था, परम्परागत पूजा विधि र मौलिक सांस्कृतिक प्रस्तुतिले डिग्रे मेला क्षेत्रलाई उत्सवमय बनाउँदै लगेको छ ।
हरेक वर्ष हरिबोधनी एकादशीदेखि कात्तिक शुक्ल पूर्णिमासम्म लाग्ने यस मेलामा रुकुम पश्चिमसहित रुकुम पूर्व, रोल्पा, सल्यान, जाजरकोट, दाङलगायत विभिन्न जिल्लाबाट श्रद्धालुहरू आउने गर्छन् । मनोकामना पूरा हुने विश्वासका साथ देवीको दर्शन गर्ने, पूजा गर्ने र भाकल चढाउने परम्पराले मेलाको धार्मिक महत्त्वलाई अझ गहिरो बनाएको छ ।
डिग्रे मेला धार्मिक आस्थाको केन्द्र मात्र होइन, स्थानीय कला, संस्कृति र परम्पराको जीवन्त उत्सव पनि हो । मेलामा प्रस्तुत हुने सगाल नाच, लट्ठी नाचलगायतका मौलिक सांस्कृतिक गतिविधिले पुस्तौँदेखि जोगिँदै आएको सांस्कृतिक पहिचानलाई उजागर गर्छन् । मेलाले स्थानीय व्यापार, जनजीवन र सामाजिक सम्बन्धमा समेत रौनक थप्ने गरेको छ ।
मन्दिर परिसरमा बढ्दो चहलपहल, दर्शनका लागि आउने भक्तजनको भीड र मेला क्षेत्रको उत्साहले डिग्रेमा पर्वको माहोल सिर्जना हुँदै गएको छ । धार्मिक विश्वास, सांस्कृतिक विरासत र सामुदायिक एकताको प्रतीक बनेको डिग्रे मेलाका यी दृश्यहरूले रुकुम पश्चिमको मौलिक पहिचानलाई झल्काउँछन् ।
केसी सिस्ने अनलाइनका सम्पादक हुनुहुन्छ ।
