घोराही । दाङको घोराही उपमहानगरपालिका -१५ डिके पेट्रोलपम्पस्थित एशियन वर्ल्ड स्कूलले रसुवाको भोटेकोशी क्षेत्रमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका आर्थिक सहयोग गरेको छ ।
विद्यालय परिवारबाट संकलन गरिएको रु. १ लाख ३५ हजार ७ सय ३३ रुपैयाँ आर्थिक सहयोग गरिएको विद्यालयका सिइओ चन्द्रप्रकाश खनालले जानकारी दिनुभयो । उहाँले संकलित रकम प्रधानमन्त्री दैवी प्रकोप उद्धार कोषमा जम्मा गरिएको समेत बताउनुभयो ।
मानवीय सहयोग तथा सामाजिक उत्तरदायित्वअन्तर्गत सहयोग गरिएको उक्त रकमले विपद्मा परेका नागरिकको राहत तथा पुनःस्थापनामा केही सहयोग पुग्ने अपेक्षा गरिएको विद्यालयकी प्रिन्सिपल शान्तिदेवी हमालले बताउनुभयो। विपद्को कठिन घडीमा प्रभावित नागरिकप्रति ऐक्यबद्धता जनाउँदै क्याम्पसले आगामी दिनमा पनि मानवीय सेवा र सामाजिक उत्तरदायित्वका कार्यलाई निरन्तरता दिने उहाँको भनाइ छ।
विद्यालयले बाढीका कारण भएको जनधनको क्षतिप्रति दुःख व्यक्त गर्दै मृतकहरूप्रति भावपूर्ण श्रद्धाञ्जली तथा घाइतेहरूको शीघ्र स्वास्थ्यलाभको कामना गरेको छ। साथै, शोकसन्तप्त परिवारजनप्रति हार्दिक समवेदना व्यक्त गरेको विद्यालय प्रवन्ध निर्देशक डा. कृष्णराज डिसीले बताउनुभयो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
