घोराही । विद्यार्थीलाई पढाइसँगै सिर्जनशील, आत्मविश्वासी र प्रतिभाशाली बनाउने उद्देश्यले गुरुकुल एकेडेमीले हाँस्य–व्यङ्ग्यात्मक कार्यक्रम सम्पन्न गरेको छ। विद्यालयले विद्यार्थीलाई हरेक अतिरिक्त तथा रचनात्मक गतिविधिमा सहभागी गराउँदै उनीहरूको कला, क्षमता र अभिव्यक्ति निखार्ने उद्देश्यले कार्यक्रम आयोजना गरेको हो। गुरुकुल एकेडेमीका घोराही, लमही र तुलसीपुर शाखाले छुट्टाछुट्टै कार्यक्रमको आयोजना गरी विद्यार्थीलाई हाँस्य–व्यङ्ग्य प्रस्तुत गर्ने अवसर प्रदान गरेका थिए।
कार्यक्रममा विद्यार्थीहरूले सामाजिक, शैक्षिक तथा समसामयिक विषयवस्तुलाई आधार बनाएर विभिन्न हास्य–व्यङ्ग्य प्रस्तुति, संवाद, अभिनय तथा मनोरञ्जनात्मक कार्यक्रम प्रस्तुत गरेका थिए। मञ्चमा उभिएर आफ्ना प्रस्तुति दिँदा विद्यार्थीमा देखिएको उत्साह, आत्मविश्वास र सिर्जनशीलताले कार्यक्रमलाई थप रोचक बनाएको थियो। कतिपय विद्यार्थीले हास्यका माध्यमबाट सामाजिक विकृति र विसङ्गतिमाथि व्यङ्ग्य गरेका थिए भने कतिपयले दैनिक जीवनका घटनालाई मनोरञ्जनात्मक ढङ्गले प्रस्तुत गरेका थिए।
गुरुकुल एकेडेमी घोराहीका प्रधानाध्यापक प्रदीप राजभण्डारीले विद्यार्थीको सर्वाङ्गीण विकासका लागि किताबको ज्ञानसँगै व्यवहारिक तथा सिर्जनात्मक गतिविधि पनि आवश्यक रहेको बताउनुभयो। उहाँका अनुसार यस्ता कार्यक्रमले विद्यार्थीमा मञ्चीय प्रस्तुति, नेतृत्व क्षमता, आत्मविश्वास र आफ्ना विचार अभिव्यक्त गर्ने सीप विकास गर्न महत्वपूर्ण भूमिका खेल्छ। यस्तै गुरुकुल एकेडेमी लमहीका प्रधानाध्यापक विवेक देवकोटाले विद्यार्थीभित्र लुकेर रहेका प्रतिभालाई बाहिर ल्याउन विद्यालयले निरन्तर यस्ता कार्यक्रमलाई प्राथमिकता दिँदै आएको बताउनुभयो। उहाँले विद्यार्थीले गल्ती गर्ने डरभन्दा पनि सिक्ने र प्रस्तुत हुने वातावरण पाउनुपर्नेमा जोड दिनुभयो। त्यस्तै, गुरुकुल एकेडेमी तुलसीपुरका प्रधानाध्यापक मुकुन्द गिरीले शिक्षा भनेको परीक्षा र पाठ्यपुस्तकमा मात्र सीमित नभएको बताउँदै विद्यार्थीको रुचि र प्रतिभाअनुसार उनीहरूलाई विभिन्न गतिविधिमा सहभागी गराउनु विद्यालयको महत्वपूर्ण जिम्मेवारी भएको उल्लेख गर्नुभयो। उहाँका अनुसार हाँस्य–व्यङ्ग्यजस्ता कार्यक्रमले विद्यार्थीलाई मनोरञ्जनसँगै सामाजिक विषयमा सोच्न र आफ्ना विचार सिर्जनात्मक रूपमा प्रस्तुत गर्न सिकाउँछ।
कार्यक्रममा सहभागी विद्यार्थीहरूले आफूले कक्षाकोठामा सिकेको ज्ञानलाई व्यवहारमा उतार्दै मञ्चमा प्रस्तुति दिने अवसर पाउँदा निकै उत्साहित भएको प्रतिक्रिया दिएका थिए।
उनीहरूले यस्ता कार्यक्रमले आफ्नो डर हटाउनुका साथै बोल्ने, अभिनय गर्ने र दर्शकमाझ आफ्ना कुरा राख्ने आत्मविश्वास बढेको बताएका थिए।अभिभावकहरूले पनि विद्यालयले पढाइसँगै विद्यार्थीको प्रतिभा पहिचान र विकासका लागि सञ्चालन गर्दै आएका यस्ता कार्यक्रम सकारात्मक रहेको बताएका थिए। उनीहरूका अनुसार बालबालिकालाई पढाइमा मात्र केन्द्रित नगरी कला, साहित्य, अभिनय, खेलकुद तथा सामाजिक गतिविधिमा सहभागी गराउँदा उनीहरूको व्यक्तित्व विकासमा थप सहयोग पुग्छ।
गुरुकुल एकेडेमीले विद्यार्थीको सर्वाङ्गीण विकास, सिर्जनशीलता र आत्मविश्वास अभिवृद्धिलाई प्राथमिकतामा राख्दै यस्ता गतिविधिलाई निरन्तरता दिँदै आएको जनाएको छ। हाँस्य–व्यङ्ग्य कार्यक्रमले विद्यार्थीलाई मनोरञ्जन प्रदान गर्नुका साथै उनीहरूभित्र रहेको प्रतिभालाई मञ्चमार्फत चिनाउने महत्वपूर्ण अवसरसमेत प्रदान गरेको छ।कार्यक्रममा कक्षा ३ देखि १० सम्मका विद्यार्थिहरुले भाग लिएका थिए ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
