देउखुरी । लुम्बिनी प्रदेश सरकारबाट एमाले मन्त्रीहरूले सामूहिक राजीनामा दिएका छन् । मुख्यमन्त्री निकट स्रोतका अनुसार एमालेका तर्फबाट सरकारमा सहभागी चार मन्त्रीले लिखित राजीनामा दिएका हुन् ।
प्रदेशमा एमालेबाट भौतिक पूर्वाधार मन्त्री भूमिश्वर ढकाल, कृषि मन्त्री दिनेश पन्थी, स्वास्थ्य मन्त्री खेम सारु मगर र ऊर्जा मन्त्री सीता शर्मा चौधरी मन्त्री रहेका थिए।
यो प्रदेशमा एमालेकै चेतनारायण आचार्य मुख्यमन्त्री छन् । एमालेले पुराना मन्त्री फिर्ता बोलाएर नयाँ नियुक्तिका लागि उनीहरूलाई फिर्ता बोलाएको हो ।
हिजो संसदीय दलको बैठक बसेर मन्त्री फेर्ने नफेर्ने निर्णय केन्द्रको समन्वयमा गर्न पार्टी प्रदेश अध्यक्ष राधाकृष्ण कँडेल, मुख्यमन्त्री आचार्यलाई अधिकार प्रत्यायोजन दिइएको थियो ।
उनीहरूको स्थानमा रूपन्देहीका तुलसी चौधरी, बाँकेका रत्न खत्री, अर्घाखाँचीका रामजी घिमिरे र गुल्मीका डिल्लीराज भुसाललाई मन्त्री बनाउने तयारी मुख्यमन्त्रीले गरेका छन् । तर अहिले प्रदेश प्रमुख बाहिर रहेकाले नयाँ नियुक्ति केही दिन ढिलाइ हुने भएको छ ।
बजेट तयारीको मुखमा मन्त्री फेर्न नहुने र मुख्यमन्त्रीसहित सबै फेर्नुपर्ने अडानमा रहेको सत्तारूढ कांग्रेसलाई दबाब सृजना भएको छ । कांग्रेस प्रदेश सभापति अमरसिंह पुनले एमालेले फेरेपछि दबाब सृजना भएको र पार्टीले पनि सोच्ने बताए ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
