दाङ । दाङको घोराही केवल एउटा सहर होइन, धेरै सपना हुर्किने ठाउँ पनि हो । यही घोराहीको परिवेशमा हुर्किएका अरुण पुन मगर आज नेपाली फिल्म क्षेत्रमा आफ्नो अलग पहिचान बनाउन संघर्षरत छन् । पुर्खौली घर रोल्पाको सुनछहरी गाउँपालिकामा भए पनि उनको बाल्यकाल, संघर्ष र सपना भने दाङकै माटोसँग जोडिएका छन् । घोराहीका गल्ली, साथीभाइ, स्थानीय परिवेश र त्यहीँको जीवनशैलीले उनलाई एउटा संवेदनशील र संघर्षशील कलाकार बन्न सिकायो ।
सानैदेखि अभिनयप्रति रुचि राख्ने अरुणका लागि कलाकार बन्ने सपना सजिलो थिएन । दाङबाट राजधानी काठमाडौं पुगेर कला क्षेत्रमा टिकिरहन धेरै मेहनत, धैर्यता र आत्मविश्वास चाहिन्थ्यो । तर उनले कहिल्यै आफ्नो सपना मर्न दिएनन् । अभिनयलाई केवल रहर होइन, जीवनको उद्देश्य बनाएर उनी काठमाडौं छिरे ।
काठमाडौंस्थित ओस्कार इन्टरनेशनल कलेज अफ फिल्म मेकरबाट ब्याचलर अध्ययन पूरा गरेपछि उनले अभिनयलाई व्यावसायिक रूपमा सिक्न थाले । त्यसपछि नेपाली रंगमञ्चका पिता सुनील पोखरेल सँग करिब चार वर्ष अभिनय सिक्ने अवसर पाए । त्यो समय उनका लागि जीवनकै ठूलो पाठशाला बन्यो । रंगमञ्चमा लगातार काम गर्दै उनले अभिनयको गहिराइ बुझ्दै गए । अनेकौं नाटकमा अभिनय गर्दै उनले आफूलाई निखार्ने काम जारी राखे ।
दाङबाट गएको एउटा युवाले राजधानीको रंगमञ्चमा आफूलाई स्थापित गर्नु सामान्य कुरा थिएन । त्यहाँ प्रतिस्पर्धा थियो, संघर्ष थियो, असंख्य चुनौती थिए । तर अरुणले हरेक चुनौतीलाई अवसर बनाउँदै अघि बढे । रंगमञ्चको लामो यात्रापछि उनी ‘खुस्मा’ फिल्ममार्फत ठूलो पर्दामा देखिन लागे । त्यो क्षण केवल उनको व्यक्तिगत सफलता मात्र थिएन, दाङबाट सपना बोकेर संघर्ष गरिरहेका धेरै युवाका लागि प्रेरणा पनि थियो ।
त्यसपछि ‘उनको स्वेटर’ फिल्ममा अभिनय गर्दै उनले आफूभित्रको क्षमता प्रमाणित गरे । अहिले प्रदर्शन भइरहेको ‘मितज्यू’ मा उनले पाएको भूमिकाले दर्शकमाझ उनको चर्चा अझ बढाएको छ । स्वाभाविक अभिनय र मेहनती कलाकारका रूपमा उनी बिस्तारै नेपाली फिल्म क्षेत्रमा चिनिन थालेका छन् ।
अरुणको यात्रा हेर्दा दाङका धेरै युवाले आफ्नो सपना देख्न थालेका छन् । किनकि उनले प्रमाणित गरेका छन्—ठूलो सपना पूरा गर्न ठूलो ठाउँमा जन्मिनु पर्दैन, ठूलो हिम्मत हुनुपर्छ । घोराहीको सामान्य परिवेशबाट उठेर फिल्म क्षेत्रमा आफ्नो स्थान बनाउन खोजिरहेका अरुण आज दाङकै गौरव बन्ने बाटोमा छन् ।
फिल्मसँगै विभिन्न म्युजिक भिडियोमा पनि अभिनय गरिरहेका अरुण अझै मुख्य भूमिकामा देखिने ठूलो चाहना बोकेर अघि बढिरहेका छन् । त्यो लक्ष्य पूरा गर्न अझै धेरै मेहनत गर्नुपर्ने उनी बताउँछन् । उनको आत्मविश्वास, लगनशीलता र निरन्तर संघर्षले भविष्यमा नेपाली फिल्म क्षेत्रमा अझ सशक्त कलाकारका रूपमा स्थापित हुने संकेत देखाइरहेको छ ।
बुवा सन पुन र आमा केशकुमारी पुनको माया, विश्वास र आशीर्वादलाई साथमा लिएर अघि बढिरहेका अरुण पुन मगर आज दाङका युवाका लागि प्रेरणाको नाम बनेका छन् । घोराहीको माटोमा हुर्किएको त्यो सपना अब नेपाली फिल्मको पर्दामा चम्किन थालेको छ ।
फोटोग्राफीमा दक्ष महरा सिस्ने अनलाइनका फोटो पत्रकार हुनुहुन्छ ।
