दाङ । दाङको घोराहीमा आयोजित विशेष साहित्यिक समारोहबीच साहित्यकार शरद गौतमद्वारा रचित मुक्तक सङ्ग्रह ‘भावनाका लहर’ को भव्य रूपमा विमोचन गरिएको छ। राप्ती साहित्य परिषद् जिल्ला शाखा, दाङको आयोजनामा नेपाल पत्रकार महासङ्घ दाङको सभाहलमा उक्त कार्यक्रम सम्पन्न भएको हो।
राप्ती साहित्य परिषद् दाङका अध्यक्ष यम रेग्मीको अध्यक्षतामा सम्पन्न कार्यक्रममा वरिष्ठ साहित्यकार उत्तमकृष्ण मजगैया प्रमुख अतिथिका रूपमा उपस्थित हुनुहुन्थ्यो। कार्यक्रममा राप्ती साहित्य परिषद् केन्द्रका सल्लाहकार पुरुषोत्तम खनाल विशिष्ट अतिथिका रूपमा सहभागी हुनुहुन्थ्यो।
विमोचित कृति ‘भावनाका लहर’ माथि टिप्पणी गर्दै प्रमुख समीक्षक डा. हिमलाल पन्थीले सङ्ग्रहभित्रका मुक्तकहरूले समसामयिक समाजको यथार्थ चित्र प्रस्तुत गरेको बताउनुभयो। उहाँले भन्नुभयोः
“यी मुक्तकहरूमा सामाजिक विकृति र विसङ्गतिमाथि कडा प्रहार गरिएको छ। वर्तमान समयमा पारिवारिक विखण्डन र आध्यात्मिक चेतनाको कमीका कारण मानिसहरू कसरी मानसिक तनावको अवस्थासम्म पुगिरहेका छन् भन्ने विषयलाई यस कृतिले अत्यन्त मार्मिक ढङ्गले उजागर गरेको छ। लेखकले जीवनका आफ्ना भोगाइ र अनुभूतिहरूलाई सरल तर गम्भीर शैलीमा प्रस्तुत गर्नुभएको छ।”
कार्यक्रममा उपस्थित विभिन्न क्षेत्रका व्यक्तित्वहरूले कृतिको सफलता तथा स्रष्टाको साहित्यिक यात्राको निरन्तरताका लागि शुभकामना व्यक्त गर्नुभएको थियो। पत्रकारहरूको तर्फबाट राप्ती पोस्ट राष्ट्रिय दैनिकका प्रधान सम्पादक शरद अधिकारी तथा साहित्यकारहरूको तर्फबाट लेखक सङ्घ दाङका अध्यक्ष खगराज न्यौपानेले बधाई तथा शुभकामना मन्तव्य राख्नुभएको थियो।
त्यसैगरी, राप्ती साहित्य परिषद् केन्द्रका सल्लाहकार पदमप्रसाद शर्मा तथा नेपाल संस्कृत विश्वविद्यालय, संस्कृति विभागका प्रमुख डा. टीकाराम उदासीले कृतिको साहित्यिक मूल्य र समाजमा यसले दिने सकारात्मक सन्देशबारे चर्चा गर्नुभयो। संस्थाका उपाध्यक्ष सुरेश कुमार पाण्डेले स्वागत मन्तव्यसहित शुभकामना व्यक्त गर्नुभएको थियो।
कार्यक्रमको समापन गर्दै अध्यक्ष यम रेग्मीले दाङको साहित्यिक श्रीवृद्धिमा शरद गौतमको यस कृतिले महत्त्वपूर्ण योगदान पुर्याउने विश्वास व्यक्त गर्नुभयो। परिवारका तर्फबाट उमङ्ग अधिकारीले उपस्थित सम्पूर्ण अतिथि तथा सहभागीप्रति धन्यवाद ज्ञापन गर्नुभएको थियो भने कार्यक्रमको सञ्चालन संस्थाका सचिव घनश्याम केसीले गर्नुभएको थियो।
उक्त विमोचन समारोहमा उल्लेख्य सङ्ख्यामा पत्रकार, साहित्यकार, साहित्यप्रेमी, शिक्षाप्रेमी, समाजसेवी तथा मानवअधिकारकर्मीहरूको गरिमामय उपस्थिति रहेको थियो।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
