घोराही । नेपाल पत्रकार महासंघ दाङ शाखाले सरकारी विज्ञापन वितरणमा भइरहेको विभेदविरुद्ध हस्ताक्षर संकलन अभियान सुरु गरेको छ।
सरकारले प्रेस तथा अभिव्यक्ति स्वतन्त्रताविरोधी अभ्यास गरेको, सूचना पहुँचमा नियन्त्रण गरेको र खर्च कटौतीको बहानामा सरकारी विज्ञापन राज्य नियन्त्रित सञ्चार माध्यमलाई मात्रै दिएको भन्दै महासंघले हस्ताक्षर संकलन अभियान सुरु गरेको हो।
केन्द्रीय कार्यक्रमअनुसार दाङ शाखाले आजदेखि सुरु गरेको यो हस्ताक्षर संकलन अभियान आगामी जेठ १४ गतेसम्म सञ्चालन हुने महासंघले जानकारी दिएको छ।
शाखाका अध्यक्ष सन्तोष सुवेदीको अध्यक्षता तथा महासंघका केन्द्रीय सचिव सविन प्रियासनको विशेष उपस्थिति अभियानको सुरुवात गरिएको हो।
महासंघको प्रांगणमा सुरु गरिएको यस अभियानमा महासंघका अध्यक्ष सुवेदीले सम्पूर्ण पत्रकार, नागरिक समाज र सरोकारवाला पक्षलाई उपस्थित भई ऐक्यबद्धता जनाउन र हस्ताक्षर गर्न आग्रह गर्नुभएको छ।
अभियानमा महासंघका पूर्व अध्यक्ष सुदीप गौतम, महासंघका सल्लाहकार दुर्गालाल केसी, प्रेस काउन्सिल नेपालका पूर्व केन्द्रीय सदस्य शरद अधिकारी लगायतको उपस्थिति रहेको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
