घोराही । दाङको घोराहीस्थित गुरुकुल एकेडेमीमा कक्षा १० का विद्यार्थीहरुको दीक्षान्त समारोह सम्पन्न भएको छ। विद्यालय परिसरमा आयोजित उक्त कार्यक्रमले विद्यार्थीहरुको शैक्षिक यात्राको महत्वपूर्ण उपलब्धिलाई औपचारिक रुपमा उत्सवका रुपमा मनाएको छ।

कार्यक्रमको अध्यक्षता विद्यालयका प्रधानाध्यापक प्रदीप राजभण्डारीले गर्नुभएको थियो भने प्रमुख अतिथिका रुपमा प्याब्सन घोराही नगर अध्यक्ष बालकृष्ण वलीको उपस्थिति रहेको थियो।

कार्यक्रममा विद्यालयका शिक्षक, अभिभावक तथा विद्यार्थीहरुको उल्लेखनीय सहभागिता रहेको थियो। त्यस्तै प्रमुख अतिथि बालकृष्ण वलीले दीक्षित विद्यार्थीहरुलाई सफलताको शुभकामना दिँदै वर्तमान प्रतिस्पर्धात्मक युगमा सीप, अनुशासन र लगनशीलता नै सफलता हासिल गर्ने प्रमुख आधार भएको बताउनुभयो। उहाँले भन्नुभयो, “शिक्षा केवल प्रमाणपत्रमा सीमित हुँदैन, यसले व्यक्तित्व निर्माण गर्छ। तपाईंहरुले सिकेको ज्ञानलाई समाज र राष्ट्रको विकासमा प्रयोग गर्नुपर्छ।” उहाँले गुरुकुल एकेडेमीले छोटो समयमै गुणस्तरीय शिक्षा प्रदान गर्दै उदाहरणीय उपलब्धि हासिल गरेकोमा प्रशंसा समेत गर्नुभयो।