दाङ। विश्वप्रसिद्ध पत्रिका टाइम म्यागेजिनले सार्वजनिक गरेको सन् २०२५ का चर्चित तस्बिरहरूको सूचीमा नेपालबाट दुई महत्वपूर्ण तस्बिर समावेश भएका छन्। यी दुवै तस्बिरले नेपालका दुई भिन्न घटनालाई विश्वसमक्ष उजागर गरेका छन्।
पहिलो तस्बिर १८ मेमा खिचिएको हो, जहाँ सगरमाथाको शिखरतर्फ उक्लँदै गरेका दर्जनौँ पर्वतारोहीहरू लामबद्ध लाइनमा देखिन्छन्। कुङ्गा शेर्पा/एपीले खिचेको यो तस्बिरले विश्वकै सर्वोच्च शिखरमा बढ्दोगर्दै गएको भीड, जोखिम र साहसलाई प्रतिनिधित्व गर्छ। पर्वतारोहण व्यवस्थापन, भीड नियन्त्रण र सुरक्षासम्बन्धी चुनौतीलाई यसले पुनः चासोको केन्द्रमा ल्याएको छ।
दोस्रो तस्बिर ९ सेप्टेम्बरमा काठमाडौंस्थित सिंहदरबारमा लागेको भीषण आगोको हो। सामाजिक सञ्जाल प्रतिबन्ध र सरकारी भ्रष्टाचारविरुद्ध युवाहरूको विरोध प्रदर्शनपछि भएको प्रहरी दमनको भोलिपल्ट सिंहदरबारमा आगो लागेको थियो। प्रभिन रानाभट/एएफपी/गेट्टी इमेजेसद्वारा खिचिएको यो तस्बिरमा मुख्य प्रशासनिक भवनबाट उठेको आगो र धुवाँ स्पष्ट देखिन्छ। आपतपछि प्रदर्शनकारीहरूले संसद् भवनमा समेत आगो लगाएका थिए, जसमा कम्तीमा १९ जनाको मृत्यु भएको रिपोर्ट गरिएको थियो।
टाइम म्यागेजिनले यी तस्बिरहरूलाई सन् २०२५ का शक्तिशाली र प्रभावशाली दृश्यका रूपमा प्रस्तुत गर्दै नेपालका घटनाहरूले विश्वको ध्यान तानेको उल्लेख गरेको छ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
