पाकिस्तानको राजधानी इस्लामाबादस्थित एक अदालत बाहिर भएको आत्मघाती हमलामा कम्तीमा बाह्र जनाको मृत्यु भएको र कम्तीमा सत्ताइस जना घाइते भएको पाकिस्तानका गृहमन्त्री मोहसिन नकभीले बताएका छन्।
उनका अनुसार बमवाहकले जिल्ला अदालतमा हमला गर्ने योजना बनाएको थियो, तर भवनभित्र प्रवेश गर्न नसकेपछि बाहिरै विस्फोट गराइयो।
गृहमन्त्री नकभीले हमलामा संलग्नको पहिचानलाई प्राथमिकतामा राखिने र दोषीलाई कानूनी दायरामा ल्याइने बताए।
हालका वर्षहरूमा इस्लामाबादमा आत्मघाती हमला दुर्लभ मानिन्थ्यो। मंगलबारको घटनास्थलबाट प्राप्त भिडियोमा जलेर नष्ट भएको कार र प्रहरीद्वारा गरिएको घेराबन्दी देखिन्छ। घाइते सत्ताइस जनाको उपचार भइरहेको गृहमन्त्रीले जानकारी दिए।
उनले हमलाकारले करिब पन्ध्र मिनेट प्रतीक्षा गरेर प्रहरीको गाडी नजिकै बम विस्फोट गराएको बताए। विस्फो
टपछि कैद गरिएको दृश्यमा सुरक्षा अवरोध पछाडि रहेको जलेको सवारीसाधनबाट बाक्लो धुवाँ उठेको देखिन्थ्यो। घटना स्थानीय समयानुसार बिहान १२:३९ बजे (जीएमटी ०७:३९) भएको हो।
पाकिस्तानी राष्ट्रपति आसिफ अली जरदारीले “आत्मघाती विस्फोटको कडाइका साथ निन्दा” गरेका छन्। घटनाको समयमा कार पार्क गर्दै गरेका एक कानुन व्यवसायीले “जोरदार विस्पोटको आवाज” सुनेको बताए। रुस्टम मलिकले एएफपीसँग भने, “सबैथोक अस्तव्यस्त थियो। वकिल र सर्वसाधारण अदालत परिसरभित्र दौडिरहेका थिए। मैले गेटमा दुई शव देखेँ, धेरै गाडीहरूमा आगो लागेको थियो।”
मंगलबारको हमलाको जिम्मा अहिलेसम्म कसैले लिएको छैन।
पाकिस्तानी प्रधानमन्त्री शहबाज शरिफले भारतको “सक्रिय समर्थन प्राप्त” उग्रवादी समूहहरू संलग्न भएको दाबी गरेका छन्। विज्ञप्तिमा उनले “भारतका आतंकी प्रतिनिधिहरूद्वारा निहत्था पाकिस्तानी नागरिकमाथि गरिएका आक्रमण निन्दनीय छन्” भनेका छन्।
दिल्ली पक्षबाट यसबारे कुनै प्रतिक्रिया आएको छैन। भारतले यस्ता आरोप पहिले पनि अस्वीकार गर्दै आएको छ।
यसअघि सोमबार भारतको राजधानी नयाँ दिल्लीमा अर्को कार विस्फोटमा आठ जनाको मृत्यु र अन्य धेरै घाइते भएका थिए। भारतीय सरकारले यस घटनालाई आतंकी हमला भनेको छैन, तर मुद्दा देशको आतंकवादविरुद्ध काम गर्ने निकायमा हस्तान्तरण गरिएको छ।
प्रधानमन्त्री नरेन्द्र मोदीले “यो जघन्य कृत्यका योजनाकारलाई उन्मुक्ति दिइने छैन, षड्यन्त्र जति नै गहिरो किन नहोस, सबैलाई कानुनी कठघरामा ल्याइनेछ” भनेका छन्।
दिल्ली विस्फोटको कारणबारे भने अझै आधिकारिक जानकारी आएका छैनन्। इस्लामाबादमा यसअघि भएको आत्मघाती हमला तीन वर्षअघि हो, जसमा एक प्रहरी अधिकारीको मृत्यु र अन्य केही घाइते भएका थिए। पछिल्ला वर्षहरूमा पाकिस्तानका अन्य भागमा आत्मघाती हमला भए पनि राजधानीमा भएको घटना दुर्लभ थियो।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
