बेइजिङ । चीनको कम्युनिस्ट पार्टी (सीपीसी) को २०औं केन्द्रीय समितिको चौथो पूर्ण बैठक आगामी अक्टोबरमा बेइजिङमा बस्ने भएको छ। बैठकले मुलुकको सामाजिक तथा आर्थिक विकासको आगामी पाँचवर्षे योजनाबारे छलफल गर्नेछ।
बैठकसम्बन्धी घोषणा सीपीसी केन्द्रीय समितिको राजनीतिक ब्युरोको बैठकपछि सार्वजनिक गरिएको हो। सो बैठक सीपीसी केन्द्रीय समितिका महासचिव सी चिनफिङको अध्यक्षतामा बसेको थियो।
बुधबारको बैठकपछि सार्वजनिक विज्ञप्तिअनुसार, आगामी पूर्ण बैठकको मुख्य एजेन्डाअनुसार राजनीतिक ब्युरोले आफ्नो कामको प्रतिवेदन पेस गर्नेछ र सन् २०२६ देखि २०३० सम्म लागू हुने पन्ध्रौं पाँचवर्षे योजना तयार गर्न आवश्यक प्रस्तावहरूमाथि अध्ययन गरिनेछ।
बैठकमा आगामी पाँच वर्ष समाजवादी आधुनिकीकरणको आधार मजबुत बनाउने र समग्र प्रयास गर्ने निर्णायक समय हुने उल्लेख गरिएको छ।
चीन अहिले विकासको परिवेशमा गहिरा र जटिल परिवर्तनको सामना गरिरहेको अवस्थामा रणनीतिक अवसर, जोखिम र चुनौतीहरू सँगसँगै रहेको उल्लेख गर्दै विज्ञप्तिमा भनिएको छ — “अप्रत्याशित घट्नाहरू बढिरहेका बेला रणनीतिक स्थिरता कायम राख्नु, निश्चित विजयप्रति आत्मविश्वास बढाउनु, परिवर्तनसँग अनुकूल हुनु, अन्तर्राष्ट्रिय प्रतिस्पर्धामा अग्रसर रहनु र चिनियाँ आधुनिकीकरणको रणनीतिक कार्यमा ठूला फड्को मार्नु आवश्यक छ।”
बैठकले गुणस्तरीय रूपान्तरण र परिमाणात्मक वृद्धि सँगसँगै नयाँ विकास मोडेल निर्माणलाई तीव्र बनाउन, घरेलु तथा अन्तर्राष्ट्रिय परिस्थितिलाई समन्वयात्मक रूपमा हेरौं, र विकास र सुरक्षाबीच सन्तुलन मिलाउनु पर्नेमा जोड दिएको छ।
बैठकमा सहभागीहरूले आम जनताको समग्र हित प्रवर्द्धन गर्ने, साझा समृद्धितर्फ ठोस पाइला चाल्ने र समाजवादी आधुनिकीकरणमा निर्णायक प्रगति गर्ने विषयमा विशेष जोड दिएका थिए।
पाँचवर्षे योजनाहरू चीनको सामाजिक तथा आर्थिक रूपान्तरणका समग्र खाका हुन्, जसले प्रत्येक चरणका लक्ष्य, रणनीति र प्राथमिकता निर्धारण गर्छ। सन् १९५३–५७ को पहिलो योजना यता यी योजनाहरूले समग्र विकासमा उल्लेखनीय योगदान पुर्याउँदै आएका छन्।
बुधबारको राजनीतिक ब्युरो बैठकमा हालको आर्थिक अवस्थाको विश्लेषण गरिएको थियो र वर्षको बाँकी अवधिका लागि आर्थिक कार्यहरूको योजना बनाइएको थियो।
बैठकमा म्याक्रो-आर्थिक नीतिहरूलाई पूर्ण रूपमा प्रयोग गर्न, घरेलु माग विस्तार गर्न, सुधार र खुलापनलाई गहिरो पार्न, प्रविधि र उद्योगबीच गहिरो समायोजन गर्न र जनजीवन सुनिश्चित गर्न ठोस कदम चाल्नुपर्ने विषयमा जोड दिइएको थियो।
मौद्रिक नीतिको प्रयोग गर्दा पर्याप्त तरलता सुनिश्चित गर्न र सामाजिक वित्त लागत घटाउनुपर्नेमा बैठकमा जोड दिइयो। प्रविधि नवप्रवर्तन, उपभोग प्रवर्द्धन, साना तथा सूक्ष्म उद्यमलाई सहयोग र वैदेशिक व्यापार स्थायीत्वका लागि विभिन्न संरचनागत मौद्रिक उपकरणहरू प्रयोग गर्नुपर्ने बताइएको छ।
बैठकमा निजी पूँजीको सक्रियता बढाउने, प्रभावकारी लगानी विस्तार गर्ने, मुख्य उद्योगहरूमा उत्पादन क्षमताको समस्याहरू सम्बोधन गर्ने र बजारका विभिन्न संरचनाहरूको जीवन्तता बढाउने कुरामा पनि जोड दिइयो।
वैदेशिक व्यापार र लगानीको आधारस्थापनामा जोड दिँदै, निर्यात कर फिर्ता नीतिमा सुधार, निःशुल्क व्यापार क्षेत्रहरूको विस्तार र खुलापनका नयाँ प्लेटफर्महरू निर्माण गर्ने कुरा पनि उठाइएको छ।
साथै, स्थानीय सरकारको ऋण जोखिम समाधान, घरेलु पूँजी बजारको आकर्षण र समावेशिता वृद्धि, र पुँजी बजारमा देखा परेको सकारात्मक लहरलाई मजबुत बनाउने विषयमा पनि छलफल गरिएको थियो।
बैठकले बाढी नियन्त्रण र गर्मी याममा उर्जाको आपूर्ति सुनिश्चित गर्न थप प्रयास आवश्यक रहेको उल्लेख गर्यो।
बुधबारको बैठकभन्दा पहिले, जुलाई २३ मा सीपीसी केन्द्रीय समितिले गैर-सीपीसी व्यक्तित्वहरूसँग बैठक गरेर हालको आर्थिक अवस्था र आगामी अवधिको आर्थिक कार्यबारे सुझाव लिएको थियो।
त्यस बैठकको अध्यक्षता गर्दै सी चिनफिङले पहिलो छ महिनामा चीनको अर्थतन्त्रले स्थिर प्रगति गर्दै सामाजिक स्थायित्व कायम राख्न सहयोग गरेको बताए।
“यसले चीनको आर्थिक आधार बलियो, बहुआयामिक क्षमतायुक्त, लचिलो र सम्भावनायुक्त छ भन्ने प्रमाणित गर्छ,” सीले भने। “गुणस्तरीय विकासलाई समर्थन गर्ने सकारात्मक पक्षहरू क्रमशः संचित भइरहेका छन्।”
सीले चीनको अर्थतन्त्र अझै धेरै चुनौती र जोखिमको सामना गरिरहेको जनाउँदै अवस्थाको सटीक मूल्याङ्कन गर्न, सम्भावित संकटप्रति सचेत रहन, सबैभन्दा खराब सम्भावनाको तयारी गर्न र विकासका अवसर, सम्भावना र फाइदालाई उपयोग गरेर आर्थिक पुनरुत्थान र सुधारको सकारात्मक लहरलाई बलियो पार्न आग्रह गरे।
वर्षको दोस्रो छमाहीमा नीतिहरूको स्थिरता, स्थायित्व, लचकता र पूर्वानुमेयता कायम राख्न, रोजगारी, उद्यम, बजार र अपेक्षाहरूलाई स्थिर बनाइराख्न उनले विशेष जोड दिए।
“उपभोग प्रवर्द्धनलाई तीव्र बनाउने, अव्यवस्थित प्रतिस्पर्धालाई सम्बोधन गर्ने, घरेलु चक्रलाई बलियो बनाउँदै अन्तर्राष्ट्रिय र घरेलु बजारबीचको दुई-चक्र प्रणालीलाई सुदृढ गर्ने र आर्थिक–सामाजिक लक्ष्यहरू प्राप्त गर्न लागिपर्नु आवश्यक छ,” उनले भने।
गम्भीर निर्णय र नीति निर्माणका बेला गैर–कम्युनिस्ट पार्टीहरू, अखिल चीन उद्योग वाणिज्य महासंघका अगुवा, र स्वतन्त्र व्यक्तित्वहरूबाट सुझाव लिने अभ्यास सीपीसीको दीर्घकालीन परम्परा हो।
स्रोतः चाइना डेली
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
