बेइजिङ। चीनका राष्ट्रपति सी चिनफिङले चीनका लागि नव नियुक्त १६ जना नयाँ राजदूतहरूबाट ओहिदपत्र (क्रेडेन्सियल) ग्रहण गर्दै उनीहरूलाई स्वागत गरेका छन् र चीनले आफ्नो उच्चस्तरीय खुलापन दृढतापूर्वक विस्तार गर्ने स्पष्ट सन्देश दिएका छन्।
राजदूतहरूसँगको सामूहिक भेटमा राष्ट्रपति सीले चीनको आर्थिक भविष्यप्रति आशावाद व्यक्त गर्दै भने, “चीनले आफ्नो विशाल बजारको लाभ विभिन्न देशहरूसँग बाँड्नेछ।”
हाल चीनले आधुनिकीकरणको आफ्नै बाटोबाट राष्ट्रलाई शक्तिशाली बनाउने र राष्ट्रिय पुनरुत्थानको महान कार्य सम्पूर्ण रूपमा अगाडि बढाइरहेको उल्लेख गर्दै उनले भने, “चीनको अर्थतन्त्र दृढताका साथ प्रगतिको दिशामा अघि बढिरहेको छ।”
उनले थपे, “चीनको नयाँ विकासले विभिन्न देशका लागि नयाँ अवसर सिर्जना गर्नेछ र विश्व आर्थिक वृद्धिमा अझ धेरै निश्चितता प्रदान गर्नेछ।”
शुक्रबार बिहान, चिनियाँ जनग्रेट हलको उत्तर गेटबाहिर जनमुक्ति सेनाका सम्मान गार्डहरूले गम्भीर अनुहारमा स्वागत गाजा बजाउँदै उभिएका बेला भियतनाम, पानामा, डोमिनिकन गणतन्त्र, अल्बानिया, न्यूजिल्याण्ड, पपुआ न्यूगिनी, एङ्गोला, इजिप्ट, निकारागुवा, इरान, चिली, युक्रेन, बेनिन, अमेरिका, इजरायल र दक्षिण सुडानका नयाँ राजदूतहरू एकपछि अर्को गरी राष्ट्रपति सीसँग भेट गर्न आइपुगे।
राष्ट्रपति सीले उनीहरूको ओहिदपत्र ग्रहण गरे र प्रत्येकसँग फोटो खिचाए। उनले शाङ्घाई सहयोग संगठनका महासचिव नुर्लान यर्मेकबायेभसँग पनि भेट गरे।
समारोहपछि राष्ट्रपति सीले सम्बोधन गर्दै राजदूतहरूलाई स्वागत गरे र उनीहरूले आआफ्ना देशका नेताहरू तथा जनतासम्म आफ्नो शुभकामना पुर्याइदिन अनुरोध गरे।
राष्ट्रपति सीले आशा व्यक्त गरे कि राजदूतहरूले चीनलाई व्यापक र गहिरो रूपमा बुझ्ने प्रयास गर्नेछन् र चीन र उनीहरूको देशबीचको मित्रता प्रगाढ बनाउन तथा विश्वसँगको आदानप्रदान बढाउन महत्वपूर्ण भूमिका खेल्नेछन्।
यस वर्ष जापानी आक्रमणविरुद्धको चिनियाँ जनयुद्ध र विश्व फासीवाद विरोधी युद्धको विजयको ८० औँ वार्षिकोत्सव हो। त्यस्तै, संयुक्त राष्ट्रसंघको स्थापना भएको पनि ८० वर्ष पुगेको वर्ष हो।
राष्ट्रपति सीले भने, “चीन सबै देशहरूसँग मिलेर राष्ट्रसंघलाई केन्द्र मानेर बनेको अन्तर्राष्ट्रिय प्रणाली र अन्तर्राष्ट्रिय कानुनमा आधारित अन्तर्राष्ट्रिय व्यवस्था दृढतापूर्वक जोगाउन तयार छ।”
सीले विश्वका सबै देशसँग मैत्रीपूर्ण सहकार्यको अभ्यास गर्न, सभ्यताबीच आपसी सिकाइ प्रवर्द्धन गर्न, साझा भविष्यको मानव समुदाय निर्माण गर्न र “यो पृथ्वीको उज्यालो भविष्यको लागि हातेमालो गर्न” चीन तयार रहेको बताए।
विश्वमा तीव्र गतिमा भइरहेका परिवर्तन र अस्थिर अन्तर्राष्ट्रिय परिस्थितिका बीच अहिले सबै देशलाई एकता र सहकार्यको आवश्यकताको झन् बढी खाँचो रहेको उल्लेख गर्दै उनले भने, “देशहरूले फुट र द्वन्द्वमाथि उठी भविष्यप्रति गहिरो दृष्टिकोण राख्नुपर्छ र सम्पूर्ण मानव जातिको हितलाई ध्यानमा राख्नुपर्छ।”
राष्ट्रपति सीले अन्त्यमा भने, “चीनले सधैँ विश्वका जनतासँगको मित्रतालाई मूल्य दिन्छ र आपसी सम्मान, समानता, पारस्परिक लाभ र दुईपक्षीय जितको आधारमा सबै देशसँग सम्पूर्ण क्षेत्रमा सहकार्य र आदानप्रदान विस्तार गर्न तयार छ।”
स्रोतः चाइना डेली
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
