घोराही । दाङको बंगलाचुली-२ मा अवस्थित मर्पेस डाँडा पछिल्ला दिनमा आन्तरिक पर्यटनको नयाँ गन्तव्यका रूपमा उभिन थालेको छ। घोराही बजारदेखि करिब १० किलोमिटर माथि रहेको यो डाँडा हरियाली, शीतल हावा र प्रकृतिको मनमोहक सौन्दर्यले सजिएको स्थल हो। यहाँको वातावरण शान्त, शीतल र ताजगीले भरिएको छ, जहाँ चिसो हावा, हरियाली र घुमाउरा बाटोहरूले मनलाई रमाइलो पार्दछन्।
विशेषगरी गर्मी मौसममा घोराहीका बासिन्दाले शहरको कोलाहल र तातोपनबाट राहत पाउन मर्पेस डाँडाको बाटो रोज्ने गरेका छन्। केवल प्राकृतिक सुन्दरता मात्र होइन, यहाँ पुग्दा शारीरिक र मानसिक थकान मेटिएर ऊर्जा पुनः सञ्चय हुने अनुभव घोराही-१५ निवासी बिशाल जिएमले सुनाएका छन्। छोटो दूरीमै यस्तो प्राकृतिक स्वर्ग पाउन सक्नु घोराही तथा आसपासका बासिन्दाका लागि सौभाग्य नै हो भन्नु पर्दछ।
मर्पेस डाँडा अहिले प्रायः आन्तरिक पर्यटकको आकर्षणमा सीमित भए पनि यसको सम्भावना असीमित छ। यो क्षेत्रलाई व्यवस्थित रूपमा विकास गर्न सकेमा प्रदेशस्तर वा राष्ट्रियस्तरको पर्यटकीय गन्तव्य बन्ने सामर्थ्य मर्पेसमा प्रशस्त छ। यसका लागि बंगलाचुली गाउँपालिका वडा नम्बर २ का अध्यक्ष मैते पुन मगरले भनेजस्तै यहाँको संरक्षण, सरसफाइ, पिक्निक स्पट निर्माण, प्रतीक्षालय, खानेपानीको उचित व्यवस्था जस्ता आधारभूत पूर्वाधार आवश्यक छन्।
यस्ता पूर्वाधारले मात्र पर्यटनलाई टिकाउ र व्यवस्थित बनाउन सक्छ। पर्यटकको सुविधाका लागि शौचालय, विश्रामस्थल, फोहोर व्यवस्थापन, संकेत बोर्ड, ट्रेकिङ मार्गहरूको स्तरोन्नति गर्न सकियो भने मर्पेसको सुन्दरता झन् चम्किलो बन्नेछ। साथै, स्थानीय समुदायलाई पर्यटनसँग जोडेर स्वरोजगारका अवसर सिर्जना गर्न सकिन्छ। यहाँ उत्पादन हुने मौलिक कृषि तथा हस्तकलाका वस्तुहरू, स्थानीय खानाका परिकार, संस्कृतिका झलकहरूलाई पर्यटकसँग जोड्न सकेमा पर्यटनले आर्थिक समृद्धिको ढोका पनि खोल्नेछ।
हाम्रो समाजमा प्रायः पर्यटनको कुरा गर्दा हामी ठूल्ठूला गन्तव्य वा महंगा परियोजनाका कुरा मात्र गर्छौँ। तर मर्पेस जस्ता प्राकृतिक र पहुँचमा सहज स्थलहरूले नै दाङलाई, र विस्तारित रूपमा सिङ्गो प्रदेशलाई, पर्यटकीय नक्सामा अझ स्पष्ट चिनाउन सक्नेछन्। यसका लागि स्थानीय तह, निजी क्षेत्र, संघसंस्था र सञ्चारमाध्यमहरूको सहकार्य अपरिहार्य छ।
मर्पेस डाँडामा पाइने हरियाली, चिसो हावा, बादलसँग खेल्ने रमाइलो क्षणहरू, अनि शहरको भागदौडबाट केही समय टाढा हुने अवसर नै यहाँको मुख्य आकर्षण हो। यो सम्भावना देखेर सकारात्मक सोच राख्नुपर्ने बेला आएको छ। मर्पेस डाँडा दाङको पर्यटकीय पहिचानमात्र नभई यहाँको आर्थिक, सामाजिक र सांस्कृतिक विकासको एउटा बलियो आधार बन्न सक्ने क्षमतामा हामी सबैलाई विश्वास राख्नुपर्छ।
मर्पेस डाँडा दाङकै होइन, सिङ्गो लुम्बिनी प्रदेशकै गौरव बन्न सकोस् भन्ने हाम्रो शुभकामना छ। अब यसलाई अझ व्यवस्थित, सुरक्षित र दिगो विकासका लागि सबै पक्ष एकजुट भएर अघि बढ्नुपर्ने बेला आएको छ।
फोटोग्राफीमा दक्ष महरा सिस्ने अनलाइनका फोटो पत्रकार हुनुहुन्छ ।
