निराजन सिर्पाली
रुकुम पूर्व। रूकुम पूर्वको कला, संस्कृति, पर्यटन तथा कृषि व्यापारलाई प्रवर्द्धन गर्ने उद्देश्यले “पूर्वी रूकुम साँस्कृतिक पर्यटन, कृषि तथा व्यापार महोत्सव – २०८१/०८२” आगामी २०८१ सालको चैत २२ गतेदेखि २०८२ सालको बैशाख ७ गतेसम्म भव्य रूपमा आयोजना गरिने भएको छ।
सिस्ने गाउँपालिका -६, छिप्रिदह, रूकुमकोट, रूकुम पूर्वमा सञ्चालन हुने यस महोत्सवमा राष्ट्रिय तथा अन्तर्राष्ट्रिय स्तरका ख्यातिप्राप्त कलाकारहरूको विशेष प्रस्तुति रहनेछ । महोत्सवको मुख्य आकर्षणका रूपमा नेपाली फिल्म उद्योगका चर्चित नायकहरू पल शाह र प्रदिप खड्का रहनुहुनेछ। साथै, लोकप्रिय गायक-गायिकाहरू बद्री पंगेनी, ज्योति मगर, समीक्षा अधिकारी, एलिना चौहान, कुलेन्द विश्वकर्मा, श्याम राणा, रामजी खाँड, राजु परियार, जीवन शर्मा लगायत दर्जनौं कलाकारहरूले आफ्नो प्रस्तुति दिनेछन्।
यस महोत्सवले पूर्वी रूकुमको कला, संस्कृति तथा पर्यटन प्रवर्द्धनसँगै कृषि र व्यापारिक गतिविधिहरूलाई समेत प्रवर्धन गर्ने लक्ष्य राखेको छ। महोत्सवमा स्थानीय उत्पादन तथा व्यवसाय प्रवर्द्धन गर्नका लागि विभिन्न स्टलहरू राखिनेछन्। कृषि, हस्तकला, लघु उद्यम, तथा पर्यटन प्रवर्द्धनका कार्यक्रमहरू पनि समावेश गरिनेछ ।
महोत्सवको आयोजना अठाले ग्रुप प्रा.लि., रूकुम पूर्वले गरेको छ भने सिस्ने गाउँपालिका, रूकुम पूर्व यस कार्यक्रमको प्रवर्द्धकको रूपमा रहेको छ। महोत्सव कार्यक्रम निर्देशक प्रकाश रन्का र संयोजक लखन स्वार रहनुभएकाे छ । आयोजक समितिका अनुसार महोत्सवमा स्थानीय तथा बाह्य पर्यटकहरूको उल्लेखनीय सहभागिता रहने अपेक्षा गरिएको छ।
शनिबार आयोजित पत्रकार सम्मेलनमार्फत आयोजक समितिले महोत्सवबारे विस्तृत जानकारी गराएको थियो। पत्रकार सम्मेलनमा बोल्दै आयोजक समितिका अध्यक्ष सुधन रेग्मीले भन्नुभयो, “यो महोत्सव पूर्वी रूकुमको पहिचान, पर्यटन प्रवर्द्धन र स्थानीय उत्पादनलाई बजारिकरण गर्ने ऐतिहासिक अवसर हो। यसले स्थानीय स्तरमा रोजगारीको अवसर सिर्जना गर्नुका साथै सांस्कृतिक पक्षलाई पनि बलियो बनाउनेछ।”
महोत्सव संयोजक लखन स्वारले भन्नुभयाे, “हाम्रो उद्देश्य पूर्वी रूकुमको मौलिकता झल्काउने कार्यक्रमहरू प्रस्तुत गर्नु हो। यसका लागि हामीले स्थानीय कलाकारदेखि राष्ट्रिय कलाकारसम्मलाई समेटेका छौं। यो महोत्सवले स्थानीय तथा बाह्य पर्यटकहरूलाई आकर्षित गर्नेछ।”
महोत्सव कार्यक्रम निर्देशक प्रकाश रन्काले थप्नुभयो, “हामीले यो महोत्सवलाई उच्चस्तरको बनाउन विशेष तयारी गरेका छौं। दर्शकहरूको मनोरञ्जनका लागि सांस्कृतिक कार्यक्रम, कृषि तथा व्यापार प्रदर्शनी, स्थानीय उत्पादन प्रवर्द्धन जस्ता गतिविधिहरू समेट्नेछौं।”
पूर्वी रूकुमको ऐतिहासिक, सांस्कृतिक, कृषि र व्यापारिक पक्षलाई उजागर गर्दै समृद्धि हासिल गर्ने लक्ष्य लिएको यो महोत्सव क्षेत्रीय तथा राष्ट्रिय स्तरमै महत्वपूर्ण पर्वको रूपमा स्थापित हुने आयोजकको विश्वास छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
