घोराही । चर्चित मोडेल तथा नृत्याङ्गना नारायणी खत्री आफ्नो गृह जिल्ला प्यूठानमा सम्मानित भएकी छन्। प्यूठान उद्योग वाणिज्य संघको २७औं साधारण सभा तथा १२औं अधिवेशनको अवसरमा संघका अध्यक्ष पशुपति नारायण नकर्मी र कार्यक्रमका प्रमुख अतिथि नेपाल उद्योग वाणिज्य महासंघका केन्द्रीय सदस्य किशोर आचार्यले उनलाई कदरपत्रसहित सम्मान गरेका हुन्।
नारायणी खत्री प्यूठानको माण्डवी गाउँपालिका-१ सिमलचौर जन्मिएकी हुन्। नेपाली सांगीतिक क्षेत्रमा आफ्नो पहिचान बनाउँदै आएकी खत्रीले थुप्रै लोकप्रिय गीतमा मोडलिङ गरेकी छिन्। ‘करिमैले पो के गर्छ काइँला’, ‘मायाले डिल गाड्यो’, ‘ठमेल असन’ जस्ता चर्चित गीतमा उनले अभिनय गरिसकेकी छन्।
कार्यक्रमका प्रमुख अतिथि किशोर आचार्यले नारायणीको योगदानप्रति उच्च सम्मान व्यक्त गर्दै भने, “नृत्य, मोडलिङ र कला क्षेत्रमा स्थापित हुन सजिलो छैन। नारायणीजस्ती मेहनती कलाकार हाम्रो समाजका लागि प्रेरणाको स्रोत हुनुहुन्छ। उहाँले अझ उचाइमा पुग्न सफल होस् भन्ने हाम्रो कामना छ।”
संघका अध्यक्ष पशुपति नारायण नकर्मीले नारायणीलाई सम्मान गर्दै भने, “हाम्रो जिल्लाबाट बाहिरिएर राष्ट्रिय स्तरमा स्थापित हुनुभएको नारायणीले प्यूठानको नाम उज्यालो बनाउनु भएको छ। उहाँको मेहनत, लगनशीलता र कलाप्रति हाम्रो संस्था गर्व गर्छ। भविष्यमा अझ सफलताको शुभकामना दिन चाहन्छु।”
सम्मान ग्रहण गर्दै नारायणी खत्रीले आफूलाई गृह जिल्लाबाट प्राप्त सम्मान विशेष महत्त्वको रहेको बताइन्। “यो सम्मान मेरो लागि अभिभावकको आशीर्वादजस्तै हो। यसले मलाई अझ राम्रो काम गर्न प्रेरित गरेको छ। सधैं माया, हौसला र समर्थन गर्दै आउनु भएकोमा सबैलाई धन्यवाद दिन चाहन्छु,” उनले भनिन्।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
