घोराही । “धैर्य गुमाए असफलता आउँछ, मिहिनेत गरे सफलता अवश्य पाइन्छ” भन्ने भनाइलाई चरितार्थ गर्दै बंगलाचुली गाउँपालिका -४ गहतेरा निवासी धनेश्वर डाँगीले शिक्षक सेवा आयोगको प्राथमिक तहको परीक्षा तेस्रो प्रयासमा उत्तीर्ण गर्न सफल हुनुभएको छ। फरक क्षमता भएका डाँगीले दुई पटक असफल भए पनि हिम्मत नहार्दै निरन्तर प्रयास गरेपछि सफलता हात पार्नुभएको हो।
डाँगीले पहिलो र दोस्रो प्रयासमा असफल भएपछि पनि आफ्नो प्रयासलाई रोक्नुभएन। बरु अझ बढी मेहनत गर्दै तयारीलाई सशक्त बनाउनु भयो। अन्ततः तेस्रो पटकमा सफलता हात पार्दै शिक्षक बन्ने आफ्नो सपना साकार गर्नुभयो।
“मेरो सफलता धैर्यता र कडा मिहिनेतकै परिणाम हो। निरन्तर प्रयास गर्न छोड्नु हुँदैन, असफलतापछि नै सफलता आउने रहेछ,” डाँगीले भन्नुभयो।
उहाँको संघर्ष र सफलता अन्य परीक्षार्थी तथा युवाहरूका लागि प्रेरणाको स्रोत बन्न सक्छ।
फोटोग्राफीमा दक्ष महरा सिस्ने अनलाइनका फोटो पत्रकार हुनुहुन्छ ।
