ज्ञानसिन्धु माध्यमिक विद्यालय घोराही दाङले गत सोमबार एक भव्य कार्यक्रमको आयोजना गरी उद्योग वाणिज्य संघ घोराहीको सभाहलमा लगेर कक्षा १२ का विद्यार्थीहरुलाई बिदाई गरेको हो ।
विद्यार्थीहरुले खचाखच भरिएको सभाहलमा बिहान ठिक १० बजेबाट सुरुभएको कार्यक्रम साँझ ७ बजे मात्र आएर समापन भएको थियो । यसबिचमा विद्यार्थीहरुले आफूभित्र दबिएर रहेका गीत, नृत्य, कविता, गजल लगायतका प्रतिभाहरुलाई प्रस्तुत गरेका थिए ।
कक्षा ११ की छात्रा पुष्पा बि.क. को अध्यक्षतामा भएको उक्त कार्यक्रममा कक्षा ११ कै व्यवस्थापन सङ्कायका छात्र विशाल नेपालीले अङ्ग्रेजी भाषामा उपस्थित सम्पूर्णलाई स्वागत गरेका थिए । उक्त कार्यक्रममा प्रमुख अतिथिको आसनबाट बोल्दै विद्यालयका प्रधानाध्यापक हुकुम बुढाथोकीले आफ्ना विद्यार्थीहरुलाई बिदाई भएर पठाउनु पर्दा मन दुखेको तर विद्यार्थीमा रहेका पढाइका अलवा विशिष्ट प्रतिभा र सिर्जनाले दङ्ग बनाएको भाव व्यक्त गर्नुभएको थियो ।
कक्षा १२ का विद्यार्थीहरुलाई वार्षिक परीक्षाको सफलताको शुभकामना दिनुहुँदै उहाँले आफ्नो विद्यालय शिक्षा, संस्कार र सिर्जनात्मक क्रियाकलाप अग्रपङ्तिका रहेको बताउनु भएको थियो । बिदाई एक प्रकृया मात्र भएकाले समयको कुनै कालखण्डमा पुनर्मिलन हुने विश्वास व्यक्त गर्दै शिक्षक, विद्यार्थीको नातालाई जीवन्त बनाउन विद्यार्थीहरुलाई आग्रह गर्नु भएको थियो । शुभकामना मन्तव्यकै क्रममा लामो समय विद्यार्थी आचरण, अनुशासन र नैतिकतामा खर्चनु भएका विद्यालयका कोर्डिनेटर तिलक अधिकारीले आफ्नो विद्यालयको व्यवस्थापन पक्ष गर्व गर्न लायक भएको र विद्यालयको टिम बजारले डाह गर्ने किसिमको भएकाले विद्यार्थीहरुको पहिलो आकर्षण ज्ञानसिन्धु भएको विचार व्यक्त गर्नुभएको थियो । यसै सनदर्भमा उहाँले कठोरता, भावुकता, सरलता, उदारता असल नेतृत्वका गुण भएकाले आफूले ती गुणहरुमा सीमाबद्ध भएर विद्यार्थीको निगरानीमा अहोरात्र खटेका कारण आफ्नो विद्यालय विद्यार्थीको रोजाइमा पर्ने गरेको बताउनु भएको थियो ।
एउटा शिक्षक विद्यार्थीको असल शिक्षक मात्र नभएर असल साथी बन्नु पर्ने भन्दै उहाँले मौनता र गम्भीर अहङ्कार र दम्भका बिम्ब र समस्याको जड भएकाले आफ्ना समस्या खुलेर राख्न विद्यार्थीहरुमा आग्रह गर्नुभएको थियो । यसअघि आफ्नो विद्यालले जिल्लामै शतप्रतिशत उत्कृष्ट नतिजा निकाल्न सफल भएकाले यो क्रमले निरनतरता पाउने आशा राख्दै वार्षिक परीक्षाको सफताको शुभकामना दिनु भएको थियो ।
शिक्षकको तर्फबाट लेखाविधिका वरिष्ठ शिक्षक नौलाबहादुर खड्काले विद्यालय वातावरण, सिकाइ र शिक्षकको संयोजनबाट ज्ञानसिन्धु उच्चस्थानमा रहेको आशय व्यक्त गर्नुभएको थियो । यसै क्रममा शिक्षिका तेजा गैरेले शुभकामना दिनुभएको थियो । उक्त कार्यक्रममा कक्षा १२ बाट तिलक पुन, राधा के.सी. र लक्ष्मण के.सी. तथा कक्षा ११ बाट विपना रिजालले आफ्ना अन्भव र विद्यालय वातावरण सम्बन्धी विचार व्यक्त गर्नु भएको थियो । अर्को कार्यक्रम अनतर्गत विद्यालयले आन्तरिक परीक्षामा विभिन्न स्थान हासिल गर्ने कक्षा १२ का सर्मिला बि.क., ललिता परियार, राधा के.सी., राजेश बि.क. तथा कक्षा ११ का विशाल नेपाली, माइकल घर्ती र विपना रिजाललाई शैक्षिक पुरस्कार तथा प्रमाणपत्र प्रदान गरेको थियो । यसवर्ष अनुशासित पुरस्कार विद्यार्थी द्वय लोकेन्द्र के.सी. र विपना चौधरीलाई प्रदान गरेको थियो भने नियमित विद्यालय आउने जेहन्दार विद्यार्थी पुरस्कार ईशान ढकाललाई प्रदान गरेको थियो । यसै क्रममा विद्यालयका आन्तरिक परीक्षामा उत्कृष्ट निरीक्षकको भूमिका निर्वाह गर्ने राप्ती शिक्षा क्याम्पसका विद्यार्थी श्रीधर डाँगीलाई उत्कृष्ट निरीक्षकको पुरस्कार प्रदान गरेको थियो ।
उक्त शैक्षिक कार्यक्रमको सहजीकरण शिक्षक देवराज भण्डारीले गर्नुभएको थियो भने बिदाई कार्यक्रमको सहजीकरण कक्षा ११ का विद्यार्थी द्वय मनोज सुनार र अञ्जना रोकाले गर्नुभएको थियो भने बिदाई भएर जाने विद्यार्थीरुलाई आआफ्नो सङ्कायका साथीहरुको सामूहिक फोटा फ्रेममा व्यवस्थित गरेर स्मरणरुपी मायाको चिनो रुपमा प्रदान गरिएको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
