डुब्रिङ, २४ माघ । रोल्पाको रुन्टीगढी गाउँपालिका ६ नम्बर वडा कार्यालय डुब्रिङले २५० जना कृषकहरूलाई बिउबिजन वितरण गरेको छ । 
वडा कार्यालयले आज मंगलबार एक कार्यक्रमको आयोजना गरी वडाभित्रका कृषकहरुलाई ५० प्रतिशत अनुदानमा तरकारी बिउबिजन वितरण गरेको हो ।
वडाका किसानहरूको मागमा आधारित ५० प्रतिशत अनुदानमा तरकारी बिउबिजन २५० घरपरिवारमा वितरण गरिएको रुन्टीगढी ६ का वडा अध्यक्ष घनबहादुर घर्तीले बताए ।
वडाले तरकारी उत्पादनलाई आय आर्जनको प्रमुख माध्यम बनाएर कृषकहरूलाई स्वरोजगार बनाउने र समाज परिवर्तन गर्न सहयोग पुर्याउने उद्देश्यले बिउबिजन वितरण गरिएको वडा अध्यक्ष घर्तीको भनाइ छ ।
कृषकलाई आवश्यक पर्ने टमाटर, खुर्सानी, फूल गोपी र बन्द गोपी ५० प्रतिशत अनुदानमा उपलब्ध गराइएको वडा कार्यालयले जनाएको छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
