नेपाल भारत सीमा क्षेत्रमा पर्ने दाङको दक्षिण चुरे क्षेत्रमा पाटे बाघको अध्ययन शुरु भएको छ । दाङ जिल्लामा पहिलो पटक स्वचालित क्यामरा जडान गरेर पाटे बाघको अध्ययन शुरु गरिएको हो । सरकारीस्तरबाट पाटे बाघको अवस्था पत्ता लगाउन ठूलो लगानीमा अध्ययन शुरु भएको हो ।
दाङ देउखुरीको दक्षिण चुरे क्षेत्रको जैविक मार्ग भएर बाघ ओहोरदोहोर गर्ने गरेको स्थानीय उपभोक्ताहरुले जानकारी दिए पनि यसको औपचारिक पुष्टि भने भएको छैन । त्यसैले बाघको अवस्था पत्ता लगाउन अध्ययन थालिएको छ ।
बाघको अवस्था, उसलाई चाहिने आहारा, बासस्थानलगायत अन्य बन्यजन्तुको समेत अवस्था पत्ता लगाउन राजपुर गाउँपालिका र गढवा गाउँपालिका क्षेत्रमा पर्ने चुरे क्षेत्रमा स्वचालित क्यामरा जडान गरिएको छ । दुई सय वटा क्यामरा जडान गरिएको देउखुरी डिभिजन वन कार्यालय लमहीका कार्यक्रम फोकल पर्सन चिरञ्जीवी खनालले जानकारी दिनुभयो ।
नागरिक वैज्ञानिक, स्थानीय उपभोक्ता र वन कर्मचारीसहितको ४४ जनाको समूह सर्भेक्षणमा खटिएको छ । ४० दिनसम्म राखिने ती क्यामरामा कैद हुने भिडियो र फोटोको आधारमा पाटे बाघ र अन्य संरक्षित वन्यजन्तुको अवस्था पत्ता लाग्ने भएको हो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
