माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादी आन्दोलनकै भरमा देशमा राजनीतिक परिवर्तन आएकाले अब यसलाई जनताको जीवनसँग जोड्न पनि माओवादी धाराको एकता अनिवार्य भएको बताउनुभएको छ ।
पोस्टबहादुर बोगटी स्मृति प्रतिष्ठानको सातौं वार्षिक साधारणसभा कार्यक्रममा शनिबार उहाँले विगतमा माओवादीमा रहेका र विभिन्न कम्युनिस्ट पार्टीमा रहेका नेता तथा समूह एकतामा आउन लागेको बताउनुभयो । ‘पूर्वमाओवादी र कम्युनिस्ट घटकहरू आउने क्रम चलेको छ । कतिपय समूहगत एकता गर्ने कुरा भएको छ’– उहाँले भन्नुभयो ।
आउने प्रतिनिधिसभा र प्रदेश सभाको निर्वाचनमा पार्टीका शीर्ष नेतादेखि कार्यकर्तासम्म एकताबद्ध भएर गयो भने वामपन्थी दलहरूमध्ये माओवादी पहिलो पार्टी बन्ने सम्भावना रहेको उहाँको भनाइ थियो ।
अर्को एक प्रसंगमा उहाँले पार्टीका नेताहरूलाई कसरी एकताबद्ध बनाएर अगाडि बढ्ने भन्ने चुनौती आफूलाई रहेको बताउनुभयो । उहाँले पार्टीको नेतृत्व तहमा रहेका नेताहरूबीचको विवादले जनतामा नराम्रो सन्देश गइरहेको र त्यसलाई कसरी मिलाउने भन्ने सबैभन्दा ठूलो चुनौती रहेको बताउनुभयो ।
अध्यक्ष प्रचण्डले एक तहका नेताहरूमा पार्टीको विचार, नीति, व्यवहार र नेतृत्वप्रति विश्वास धर्मराएको आफूले देखेको बताउनुभयो । ‘नेताहरूको एउटा पंक्तिमा विचार, व्यवहार, नीति, नेतृत्वप्रतिको विश्वास धर्मराएको देखिन्छ’– उहाँले भन्नुभयो– ‘नेताहरू एकढिक्का भएर जाने हो भने जनता जुरुक्क उठ्ने सम्भावना छ । नेताहरूलाई के गरी मिलाउने भन्ने, आजको सबैभन्दा ठूलो चुनौती भएको छ ।’
तराई मधेसका नेताहरूमा विवाद रहेकाले स्थानीय तह निर्वाचनमा ५० ठाउँमा पराजित हुनुपरेको प्रचण्डको भनाइ थियो । मधेसमा अरु पार्टीबाट माओवादीमा कार्यकर्ता र बुद्धिजीवी प्रवेश गरिरहँदा पार्टीका शीर्ष नेताहरू भने आपसमा लडाइ गरिरहेको भन्दै उहाँले असन्तुष्टि व्यक्त गर्नुभयो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
