रोल्पाका पुराना काँग्रेस नेता पूर्णबहादुर बुढालाई आफ्नै भाइले घाँटी रेटेर हत्या गरेको खुल्न आएको छ ।
रोल्पा नगरपालिका–६ दार्बोटका ५६ वर्षीया बुढा आफ्नै घरमा सोमबार बिहान करिब ११ बजेको समयमा घाँटी रेटिएको अवस्थामा मृत फेला परेका थिए । बिहान अबेरसम्म ढोका नखुलेपछि स्थानीयले ढोका खोलेर हेर्दा उनलाई त्यस्तो अवस्थामा फेला पारेका थिए ।
प्रहरीले अनुसन्धान गर्दै जाँदा मृतकका आफ्नै कान्छा भाइ अमरराज बुढाले हत्या गरेको खुल्न आएको रोल्पाका प्रहरी प्रमुख डिएसपी नरेशराज सुवेदीले जानकारी दिएका हुन् ।
नेपालगञ्जबाट कुकुर सहितको टोली समेत खटिएको थियो । डिएसपी सुवेदीका अनुसार घरायसी रिसिबीका कारण भाइले दाजुको हत्या गरेको पाइएको छ । मृतकका दुई वटी श्रीमती रहेको र दुवैको मृत्यु भएको थियो । एक छोरा काठमाडौँ र दुई छोराहरू विदेशमा रहेको, छोरी बुहारीहरू दाङमा बस्ने भएकोले उनी घरमा एक्लै बस्दै आएका थिए ।
त्यस गाउँमा पुराना काँग्रेस नेता मानिने बुढा क्षेत्रीय प्रतिनिधि थिए ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
