नेपाल कम्युनिष्ट पार्टी (नेकपा)का केन्द्रीय सदस्य एवं राष्ट्रियसभा सदस्य जगप्रसाद शर्मा ‘अपार’ कुनै पनि हालतमा पार्टी विभाजन नहुने बताउनुभएको छ ।
१८ बर्षअघि आजकै दिन २०५९ साउन १६ गते तत्कालीन शाही सेनाद्वारा सामूहिकरुपमा १२ जना दलितहरुको हत्या भएको दिनको सम्झनामा दाङको दंगीशरण वडा नम्बर २ कौवाघारीमा सहिद परिवारले आयोजना गरेको स्मृति सभालाई सम्वोधन गर्दै उहाँले यस्तो धारणा राख्नुभएको हो ।
‘पार्टी कुनै पनि हालतमा फूट्दैन तर सघन वैचारिक बहस र निष्कर्षविना पनि मिलिहाल्दैन’– उहाँले भन्नुभयो– ‘आजको बहस पद र शक्तिको होइन, विचार र शैलीको बहस हो, त्यसैले मूल नेतृत्वको रुपान्तरण र समाजवादप्रतिको पुनःप्रतिबद्धता नै एकताको आधार हुने छ ।’
सहिद तथा बेपत्ता परिवारका केही गुनासा र समस्या रहेको स्वीकार गर्दै उहाँले आजको परिवर्तनको पहिलो हकवाला नै सहिद बेपत्ता परिवार र घाइते अपांगहरु भएकाले उनीहरुको ब्यवस्थापन राज्यसत्ताको दायित्व भएको बताउनुभयो ।
नेकपा दाङका अध्यक्ष टीकाराम खड्काले सहिदहरु यो परिवर्तनका सम्पत्ति भएकाले सहिद तथा बेपत्ता परिवारकै सुझावअनुसार पार्टी अघि बढ्ने बताउनुभयो । कम्युनिष्ट आन्दोलन र विकास निर्माण, जीविकालगायत हरेक क्षेत्रमा सहिद परिवारलाई समावेश गरेर लगिने पनि उहाँले बताउनुभयो ।
सहिद परिवारका देबहादुर नेपालीको अध्यक्षतमा भएको कार्यक्रममा अनेरास्ववियूका केन्द्रीय सदस्य सन्तोष पोख्रेल, जनसांस्कृतिक महासंघ दाङका संयोजक एवं सहिद परिवार समाज दाङका सचिव टीका बुढा ‘रञ्जित’, भीमबहादुर ओली महेशलगायतले बोल्नुभएको थियो ।
सीता बस्नेतको स्वागत मन्तव्यबाट शुरु भएको कार्यक्रम सञ्चालन मदन जीएमले गर्नुभएको थियो । गोल्टाकुरी हत्याकाण्ड तथा जनयुद्धको क्रममा यहाँबाट सहादत प्राप्त गरेका सहिदहरुको सम्झनामा सहिद परिवारको आयोजनामा पहिलोपटक कार्यक्रम गरिएको हो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
