महत्वपूर्ण ऐतिहासिक परिवर्तनको चरणमा रुकुमले खेलेको भूमिकाबारे यहाँहरु ज्ञात नै हुनुहुन्छ । नेपाली जनयुद्ध अघि बढाउन, सामन्तवादविरुद्ध लड्नका लागि रुकुमबाट वर्गसंघर्षको सुरुवात भएको थियो । रुकुम रोल्पाबाट जनयुद्धको आधार निर्माण गर्दै अगाडि बढेको थियो । जनयुद्ध नेपाली राजनीतिक परिवर्तनको महत्वपूर्ण ऐतिहासिक कडी थियो ।

२००६ सालमा स्थापना भएको नेपाल कम्युनिस्ट पार्टी झापा आन्दोलन हुँदै अघि बढ्ने क्रममा विभिन्न खेमाहरुमा विभाजित थियो । एउटा खेमा शान्तिपूर्ण आन्दोलनबाट अगाडि बढेको थियो । अर्को नेतृत्व सशस्त्र विद्रोहको दिशाबाट अगाडि बढेको थियो ।

जनयुद्धको जगमा हामीले सबै राजनीतिक दलहरुलाई जनयुद्धको र जनआन्दोलको अभियानमा सामेल गर्न सफल भएका थियौं । कमरेड प्रचण्डले त्यो भूमिका खेल्नु भएको थियो । यो इतिहासको तथ्य हो । हामी आज जनयुद्धको महान २५ औं वार्षिकोत्सव मनाइरहेका छौं । आज म त्यही कार्यक्रममा सहभागी हुन जादैछु ।

जनयुद्धको ऐतिहासिकता, यसको महत्व, नेपालको राजनिति परिवर्तनमा यसले खेलेको भूमिका नेपालमा मात्र होइन, विश्व राजनीतिको इतिहासमा एउटा महत्वपूर्ण घटना हो । यसको व्यपक छलफल र समीक्षा भविष्यमा हुँदै जानेछ । यो तथ्य हो । सूर्यलाई हत्केलाले छेकेर छेक्न सकिँदैन । यस अर्थमा यो भूमिबाट यहाँहरुलाई स्वागत गर्न पाउँदा खुसी छु ।

प्रेस सगठन नेपालको काँधमा ठूलो जिम्मेवारी छ । यसको काँधमा भएको जिम्मेवारी, पार्टीको काँधमा भएको जिम्मेवारी र पार्टीको सरकारको काँधमा भएको जिम्मेवारी हेर्दा फरक–फरक देखिए पनि हामी एउटै उद्देश्य र लक्ष्यमा आधारित छौं । हामी समाजवादी क्रान्तिको लागि अगाडि बढीरहेका छौं । समाजवादी क्रान्तिको लागि आ–आफ्नो मोर्चालाई सुदृढ गर्दै अगाडि बढ्नु पर्दछ ।

दलाल पुँजिवादविरुद्ध संघर्ष गर्दै आत्मनिर्भर अर्थतन्त्रको विकास गर्नुपर्ने आवश्यकता छ । दलालहरुको घेराले विभिन्न ठाउँमा घेरेको छ । दलालहरुको विस्तार भइरहेको छ । भ्रष्टाचारको विस्तार भइरहेको छ । त्यसका विरुद्ध पार्टी, सरकार, सञ्चार सबै एकताबद्ध भएर लाग्नु अवश्यक छ । जबसम्म भ्रष्टाचारको अत्य हँुदैन, दलालहरुको घेरा तोड्न सकिँदैन । तबसम्म जनताले चाहेअनुसारको काम गर्न सक्दैनौं ।

सरकारले गरेको कामको विषयमा केन्द्रीय कमिटीमा प्रधानमन्त्रीले दुई घण्टा ब्रिफिङ गर्नुभएको छ । जनताले त्यसको समीक्षा गरिरहेका छन् । जनताले आफूहरुले कहाँ र कसरी उपलब्धी पायौं भनेर हेरिरहेका छन् । सरकारले गरेका राम्रो कामलाई स्थापित गर्दै गर्न बाँकी र गर्न नसकेका कामहरुमा पार्टीले विशेष निर्देशन दिएर अगाडि बढाउनु आवश्यक छ ।

तीन तहको सरकारहरुको सन्दर्भमा प्रश्न उठिरहेको छ । एउटा समाचार आयो सबैतिर भ्रष्टाचार भयो । कतिपय ठाउँमा भएको छ । कतिपय तथ्यहरु उजार भएका छन्, कति मानिसहरु समातिएका छन् । भएकै कुराहरु हुन् । तर राम्रो काम पनि भएका छन् । राम्रा कामलाई पनि सँगसँगै स्थापित गरेर जानु पर्छ । सबै नराम्रो मात्र छ, भनेर जाने हो भने संघीयता नचाहानेहरुलाई बल पुग्छ । उनीहरु संघीयता उल्ट्याउन चाहान्छन् । त्यसैले राम्रा कामलाई पनि हामीले स्थापित गर्दै जानु पर्छ ।

सञ्चार क्षेत्रका साथीहरुले खराब भएकालाई भण्डारभोर र उजार गर्दै जानुस् । राम्रा कामलाई पनि स्थापित गर्दै जानुस भन्ने आग्रह गर्न चाहान्छु । केही प्रदेश सरकारको सञ्चालनमा केही समस्या छन् । कर्णाली प्रदेशको सञ्चलनमा केही समस्या आएको छ । संघीय सरकारबाट कानुन निर्माणमा ढिलाई हुँदा प्रदेश सरकार निकम्मा हो की जस्तो भएको छ । प्रदेश सरकारको कामहरुलाई कुण्ठित गर्ने काम भएको छ । कहिले त्यही कुरा तल र कहिले त्यही कुरा माथि गर्ने कुराले संघीयतामाथि खेलवाड भइरहेको छ ।

सरकारले राम्रो काम पनि गरेको छ । सँगसँगै गर्नुपर्ने कामहरु अझै भइरहेको छैनन् । नेपालका गरिब दुःखीले जुन उपचार पाउनु पर्ने थियो त्यो पाएका छैनन् । सार्वजनिक शिक्षाको सुधार भएको छैन । १५–२० लाखलाई वर्षमा रोजगारी दिने अवस्था छ तर किन भई रहेको छैन ? मैले स्थायी समितिमा यो कुरा राखेको छु । हामीले यी विषयमा छलफल गर्नु छ ।

मैले सम्माननीय प्रधानमन्त्री ज्यूलाई भेटेर भनेको छु– प्रधानमन्त्री ज्यू तपाईले अहिले सफलता र असफलताको कुरा नगर्नुस्, अहिले जे काम अगाडि बढेको छ । त्यसलाई गति दिनुस्, रफ्तारमा अगाडि लैजानुस् । यसको मूल्यांकन त आगामी निर्वाचनमा हुनेछ । तपाईले गरेको नेतृत्व दृढतापूर्वक अगाडि बढाउनुस्, तीव्रतामा अगाडि बड्नुस् । भ्रष्ट्राचारको अत्य गर्नुस्, सुशासनको स्थापना गर्नुस् । भनेर मैले सुझाव दिएको थिएँ ।

त्यसो गर्दा मात्र हामी जनताको मन जित्न सक्छौं । नेकपाले जनताको आधारभूत आवश्यकतालाई पूर्ति गर्नु पर्दछ । संविधानमा लेखिएका मौलिक कुराहरु जनताले खोजेका छन् । त्यसलाई पुरा गर्न आर्थिक विकास र आत्मानिर्भरको बाटोमा अगाडि बढ्नु छ ।

सरकारलाई हामी सबैले मद्दत गर्ने हो । सरकारलाई अझ राम्रो बनाउन मद्दत गर्ने हो । हामीले सरकारको भण्डाफोर होइन, सरकारलाई निर्देशन गर्ने हो । नपुगेको ठाउँमा पार्टीले निर्देशन गर्ने हो ।

हिजो म कमाण्डर थिएँ । कमाण्डर हुँदा हरेक सदस्यलाई बोल्ने स्वतन्त्रता थियो । सदस्यले आफ्नो कुरा राख्नु पाउने अवस्था थियो । सबै सदस्यले योजना बनाएर मात्र बल्ल लढाईमा जाने गर्दथ्यो । ति पार्टी समितिहरु जनवादमा आधारीत थिए । पार्टीमा मात्र होइन । सेनाको टुकडीमा पनि जनवाद थियो । आदेशमा चल्दथ्यो । लडाईमा जाँदा आदेशको पालना हुँन्थ्यो । अहिले यो पार्टी आदेशमा चलेको देखेको छु । आदेश मात्र चलेको छ । एउटा व्यक्तिले जे भन्यो त्यही मात्र चल्ने अवस्था हँुदैन भनेर हामीले आवज उठायौं र स्थायी कमिटीको बैठक बस्न सफल भयो । केन्द्रीय कमिटीको बैठक सफल भयो ।

केन्द्रीय जनवादमा पार्टी चल्नु पर्दछ । कुनै व्यक्ति चाहे प्रचण्ड चाहे केपी ओली पार्टीभन्दा माथि हुन सक्दैन । जनवादमा आधारित पार्टी चलाएर आएका मान्छे हौं । नदेख्नेहरुले, नजान्नेहरुले, नबुझ्नेहरुले अरुले भनेको भरमा के–के भन्लान् ? त्यो अर्कै कुरा हो । तथ्यमा पार्टी संगठन चलाउदा कसरी चलायौं ? त्यत्रो फोर्स कसरी निर्माण गयौ ? कसरी चल्यो होला ! जनवाद थिएन भने त्यो सम्भव हुँदैन । त्यसकारण जनवादमा चलेको पार्टीलाई पूर्ण जनवादमा चलाउन आवश्यक छ । कमिटीमा हरेक सदस्यको स्वामित्व हुन जरुरी छ । हरेक कमिटीहरु प्रभावकारी हुन पर्दछ । दुईजना र चारजना बसेर निर्णय गर्ने कुरा हुँदैन ।

कर्णालीमा गुटको अत्य गरौं भनेको छु । चिरा परको संगठनलाई अब एकताबद्ध गरेर लैजानु पर्दछ । इतिहासका महत्वपूर्ण कुरालाई हामीले साथमा लिनु पर्दछ ।

हाम्रो शंस्लेषण के हो भने झापा आन्दोलनपछि शान्तिपूर्ण मार्गमा आएको पार्टीले शान्तिपूर्ण ढङ्गले जति काम गर्यो । जनयुद्धलाई मद्दत गर्यो । जनयुद्धमा पार्टीले हतियार उठाए । फेरि शान्तिपूर्ण रुपमा अगाडि बढेको पार्टीलाई मद्दत पुर्यायो । जनयुद्ध हुदैन थियो भने शान्तिपूर्ण तरीकाले अगाडि बढेको पार्टीलाई निरङ्कुशताले खाई सकेको हुने थियो । जनयुद्धले तिनको रक्षा गरेको थियो । जनयुद्धमा गएको पार्टिलाई शान्तिपूर्ण रुपमा रहेको पार्टीले सदनसम्म ल्याउन मद्दत गरेको थियो । त्यसो नभएको भए त्यो पनि अप्ठेरोमा पर्ने थियो । यो हाम्रो शंस्लेषण हो ।

पार्टी एकताको पहल गर्ने मान्छे म हुँ । एकताको पस्ताव राख्ने मान्छे म हुँ । केपी ओली र प्रचण्ड दुईतिर फर्किएको अवस्था थियो । यो सत्य कुरा हो । उहाँहरुको अगाडि राखेको कुरा झुटो हैन । उहाँहरु हात मिलाउन पनि असम्भव देख्नुहुन्थ्यो । यो सम्भव छ । मैले हेरें, देशभरको विश्लेषण गरें । फेरि पनि राजनीतिक स्थायीत्व नहुने, नयाँ संविधान कार्यन्वयन नहुने अवस्था देखिसकेपछि मैले गएर नेताहरुलाई हारगुहार गरेको हो । चार महिनासम्म मैले रातौं रात घण्टौंसम्म मिटिङ गरेको छु । उहाँहरुलाई एउटा सहज वाताबरण गराएर, छलफलमा ल्याएर, बुँदा–बुँदा लेखेर, दुईजनालाई सहमत गराएर, दुइटालाई लिएर दस्तावेजमा हस्ताक्षेर गराउने मान्छे म हुँ ।

मेरो साथमा विष्णु पौडेल पनि हुनुहुन्थ्यो । पार्टी एकता गरेर समाजवादी क्रान्तिलाई अगाडि लैजाने र आत्मनिर्भर बनाउनका लागि हो । यो फेरि फुटाउनको लागि होइन । यो पार्टी फुटाउनु पर्दछ भनेर लागिरहेका छन् । खबरदार पार्टि फुटाउने फुटवादीहरुलाई अब अवसर दिइने छैन ।

धेरै ठूलो त्याग र वलिदानपछि एकता गरिएको छ । एकीकृत गरिएको पार्टीलाई कसरी एकताबद्ध गरेर लैजाने भनेर सबैले पहल गुर्नपर्नेछ । म कमरेडहरुलाई एकताको पक्षमा जोडदार रुपमा लाग्न अनुरोध गर्दछु । केपी ओली नै हाम्रो नेता हो । प्रचण्ड नै हाम्रो नेता हो । माधव नेपाल नै हाम्रो नेता हो । उहाँहरुलाई हामीले नेता मानेका छौं । तर पार्टीको गुटको पक्षमा कोही लाग्छ भने त्यो मान्य हँुदैन । किन भने ठूलो त्याग र बलिदानपश्चात यो पार्टी एकता गराएको हो ।

पार्टी एकताको ऐतिहासिक महत्व बिर्सिएर हामी फेरि जथाभावी बोल्दै हिड्ने, गर्दै हुड्ने, अराजग ढङ्गले गयौं भने जनतालाई स्वीकार्य हुदैन । हामीलाई भन्न त एक छिन जिब्रोको स्वाद आउँला तर जनताले मान्नेवाला छैन ।

सञ्चारकर्मी साथीहरुलाई म के भन्न चाहान्छु भने तपाईहरु हरदम अरु कुरा भन्नुस्, व्यक्तिको मेरो कुरा भन्नुस्, मैले गरेको गल्ती भन्नुस्, तर पार्टी एकताको विपक्षमा एक शब्द बोल्नु भयो भने त्यो कुरा सह्य हुने छैन । किनभने त्यो हाम्रो हितमा छैन । समाजवादी क्रान्तिको बाटोमा छैन ।

हामीले बन्दुक उठाउँदै गर्दा के–के कुराहरु थिए ? कस्तो अवस्था थियो ? गणतन्त्र आउँछ, भन्ने विश्वास थियो कसैलाई ? यो देशमा राजतन्त्र अत्य हुन्छ भन्ने विश्वास थियो ? तर हामी दृढतापूर्वक लडाईमा होमियौं । हाम्रा योद्धाहरुले वलिदानी गर्नुभयो । हजारौं घाइते हुनुहुन्छ । यो नेपालले गर्व गर्ने कुरा हो कि होइन ? त्यसलाई सम्मान गर्ने कुरा हो कि होइन ? हामीले सम्मान गर्दा के इतिहासको अवमुल्यन हुन्छ ? हाम्रो राजनीतिक एकतामा भाँजो आउँछ ? आउँदैन ।

मैले राजनीतिक प्रतिवेदनको आधारमा बोलेको छु । तपाईंहरुलाई म राजनीतिक प्रतिवेदनमा भनेको कुरा भन्न चाहान्छु । राजनीतिक प्रतिवेदन लेख्ने मान्छे म पनि हुँ । राजनीतिक प्रतिवेदनमा हस्ताक्षर गराउने साक्षी म हुँ । यहाँ लेखिएको कुरा तपाईहरुलाई सुनाउन चाहान्छु । यो भन्दा बाहिर कसैले बोल्न पाइदैन ।

यसै अवधिमा सामन्तवाद र साम्राज्यवादको विरुद्ध नयाँ जनवादी क्रान्ति सम्पन्न गर्न दीर्घकालीन जनयुद्धका रुपमा बल प्रयोग अनिवार्य रहेको निष्कर्षका साथ नेपालको ठोस परिस्थतिमा राजनीतिक र फौजी रणनीतिको विशिष्ट सन्तुलन कायम गर्दै कमरेड प्रचण्डको नेतृत्वमा नेकपा माओवादीले २०५२ फागुन १ गते जनयुद्धको पहल गर्यो । त्याग वलिदानको कीर्तिमान कायम गर्दै माओवादी जनयुद्धले नेपाली राजनीतिमा नयाँ तरङ्गसहित दुरगामी प्रभाव पार्यो । महिला, दलित, मधेशी, जनजाति लगाएत उत्पीडित वर्ग र समुदायलाई जागृत र संगठित गर्न राजनीतिमा समायोजनको मुद्दालाई संगठित गर्न, संविधानसभाको निर्वाचन गर्न र संघीय गणतन्त्रको आधार तयार पार्न माओवादी आन्दोलनले महत्वपूर्ण भूमिका खेल्यो । यो राजनीतिक प्रतिवेदनको कुरा हो ।

यो दुई पार्टीले स्वीकार गरेको कुरा हो । यो हामीले केन्द्रीय कमिटीले अनुमोदन गरेको कुरा हो । वैचारिक राजनैतिक सिद्दान्तको विकासको क्रममा प्रचण्डकै नेतृत्वमा नेकपा माओवादीले एकाइसौं शताब्दीमा नयाँ जनवादको विकाससहित संविधानसभाको निर्वाचन र सरकारको अन्तरसम्बन्ध बारे ठोस कार्यक्रम समेत प्रस्तुत गर्याे ।

नेकपा माओवादीको पछिल्लो सैद्दान्तिक राजनीतिक विचारले नेकपा एमाले र अन्य दलसँग समझदारीका साथ शान्ति सम्झौतासम्म पुग्ने अवस्थासम्म देशलाई ल्याइ पुर्याउन ठूलो योगदान गर्यो । यहाँ धेरै कुरा छ । यो राजनीतिक प्रतिवेदनकमा लेखिएको कुरा हो ।

राजनीतिक प्रतिवेदनमा प्रष्ट जनयुद्ध लेखिएको छ । जनयुद्धलाई स्वीकार गरेर दुई पार्टीको एकता भएको हो । आज होइन की भनेर भ्रममा नपर्नु होला । यही हो हामीले पास गरेको राजनीतिक प्रतिवेदन । केन्द्रीय कमिटीले पास गरेको प्रतिवेदन हो । त्यस अर्थबाट दुवै आन्दोलन शान्तिपूर्ण आन्दोलन सबै बामपन्थीहरु रोल्पामा गएर गरेको राजनीतिक सहमति । त्यसको आधारमा भएको बाह्र बुँदे सहमति । बाह्र बुँदे सहमतीको आधारमा सबै राजनैतिक पार्टिहरुलाई राजतन्त्रको बिरुद्धमा लागेर नेपाली कंग्रेसलाई पनि गणतन्त्रको पक्षमा ल्याएर राजतन्त्रको विरुद्धमा ल्याएर गणतन्त्र ल्याउन जनयुद्धले भूमिका खेलेको हो ।

जनयुद्ध र जनआन्दोलनले राजतन्त्रको अत्य गरेको हो । आज हामीले गर्वले बोल्न सकेका छौं र भन्न सकेका छौं । आज लोकतन्त्रको सुदृढिकरण गर्न हामीमाथि प्रश्न उठीरहेको छ । कतै बन्दी बनाउन खोजिएको छ । भनेर हामी कम्युनिस्टलाई इंगित गरिएको छ । मैले भने यही रोष्टमबाट त्यो हुन दिइदैन । हुने छैन । हाम्रो पार्टीले गर्न दिने छैन । भनेर मैले जवाफ दिएको थिएँ ।

कुनै पनि अधिकार हनन हुनेगरी कम्युनिस्ट पाटीले त्यो गर्दैन । किनभने युद्धमा जाने पार्टीले स्वातन्त्रताको अर्थ बुझेको हुन्छ । महत्व बुझेको हुन्छ । मैले जति बुझेको छु । तपाईहरुले जतिकै बुझेको छु ।

पार्टी एकताबद्ध भएको कुरा कसैलाई मन परेको छैन भने त्यसलाई छोडिदिनुस् । यो पार्टीको एकता देशको विकासको लागि, समृद्धिको लागि, जनताको लागि आवश्यक हो । त्यकारण एकताको विरुद्धमा एकतालाई भाड्ने गरी कसैले बोल्छ भने त्यो स्वीकार्य हुनेछैन । एकता गर्न सकिँदैन भन्दाभन्दै एकताको पहल गर्नेले यति भन्नु पर्दछ ।

एकतालाई रक्षा गर्दै एकताको पक्षमा हामी जाने हो । अब हामी गुटको नाममा गलतको समर्थन र सहिको विरोध गर्न सक्दैनौं । हाम्रो विधि छ । पद्धति छ । हामी पार्टीभित्र छलफल गर्न सक्छौं । आलोचना र आत्माआलोचना गर्ने भनेर केन्द्रीय समितिमा निर्णय पनि गरेका छौं ।

इतिहासको आन्दोलनलाई सबै कुरालाई शंस्लेषण गरेर यो पार्टी एकता भएको हो । हिजो ६ सालदेखि पुष्पलालले खेलेको भूमिकादेखि लिएर आज पछिल्लो समयमा चौम, कोके हुँदै अगाडि बढेको माले एमाले र माओवादी एकता केन्द्र हुदै यहाँसम्म आएको समग्रको शंस्लेषण यो दस्तावेजभित्र छ ।

यो एकता त्यतिकै भएको होइन । बाटोमा भेट्टाएर आँखा सन्काएर लभ गरेको जस्तो होइन । हामी दुईटा प्रचण्ड र म भनेर प्रधानमन्त्रीले भन्ने गर्नुभएको छ । त्यो भनेको सैद्धान्तिक आधारमा जगमा हिजोको समग्र मूल्यांकनको आधारमा भएको छ, भन्ने कुरा हो । त्यसकारण हामी सचेत हौं र सम्यम हौं । एकताविरुद्ध र नेकपा विरुद्धमा भडभैलो हुने गरि कसैले बोल्ने होइन ।

चुनावमा गइयो । चुनावपछि पार्टी एकता हुन्छ कि हुँदैन भनेर फेरि त्यहाँ अनेक कुराहरु भए । अनि फेरि त्यहाँ भिड्न परो भिडेको भिड्डै । नेताहरुको कार्य विभाजन हुने स्थिती आयो । फेरी त्यहाँ समस्या पैदा भयो । केन्द्रीय समितिको बैठक भयो फेरि आशंकाहरु पैदा भएको छ । सम्माननीय प्रधानमन्त्री केपी र अध्यक्ष प्रचण्डलाई पनि खबरदारी गर्न चाहान्छु । त्यो कुरा हामीलाई मान्य हुने छैन । किनभने हामी नेता मान्छौं, नीति मान्छौं, विधि मान्छौं, पद्धति मान्छौं त्यो भन्दा बहिरबाट तपाई गर्न खोज्नुहुन्छ भने त्यो कुरा मान्य हुने छैन ।

अब जनता सचेत भएका छन् । कार्यकर्ताले कुरा बुझेका छन् । हामीले बुझेका छौं । हामीलाई समाजवाद चाहिएको छ । समाजवादमा आधारित क्रान्ति हामिलाई चाहिएको छ । इतिहासको कुरालाई ढाकछोप गरेर त्यसलाई त्यसलाई कमजोर बनाएर बलियो भइने होयन । एकतालाई बलियो बनाएर विचारलाई माथि उठाएपछि नयाँ विचारको शंस्लेषण गरेर हामीले विधि र पद्धतिलाई स्वीकार गरेर । आत्मासात गरेर हुने कुरा हो ।

सरकारले घेरा तोड्नु पर्दछ । घेरा ताडेर अगाडि बढ्नुस भनेर मैले प्रधानमन्त्री ज्यूलाई भनेको छु । दुईटा ‘टार’ घेराबाट बच्नु पर्छ, बालुवाटार र खुमलटार घेराबाट बचेन भने फेरी पार्टीमा समस्या आउँछ ।

कमरेडहरु मेलै प्रेस संगठनको भूमिकालाई यसकारण व्यख्या गरेको छु की एउटा ठूलो संकटबाट कम्युनिस्ट आन्दोलनलाई अगाडि बढाउन भएको एकता हो । त्यसकारण एकतालाई बचाएर मात्र हामी अगाडि बढ्न सक्छौं र हाम्रो स्वातन्त्रता, अधिकार, राष्ट्रियताको रक्षा त्यसबाट मात्र हुन्छ । नेकपा असफल हुँदा नेकपा मात्र होइन देशै असफल हुन्छ । यो देशको जनताले दुःख पाउनु पर्ने स्थिती हुन्छ । त्यसकारण देशलाई सफल गर्न पार्टीलाई सफल गर्नु छ । पार्टी सफल हुन विधि र मूल्यमान्यतामा अगाडि बढ्नु छ । प्रतिवेदन पढेर मात्र बोल्नु पर्दछ । धेरैले नपढेर बोलेको देखेको छु । दुई तीन पटक पढ्नुस् । नयाँ पुस्ताले नेतृत्व गर्नु पर्दछ । नयाँ पुस्ताले नेतृत्व गर्दा बिशाल हृदय बनाएर गर्नु पर्दछ ।

(सत्तारुढ नेपाल कम्युनिस्ट पार्टी (नेकपा)का स्थायी कमिटी सदस्य जनर्दान शर्मा ‘प्रभाकर’ले प्रेस संगठन नेपाल, कर्णाली प्रदेशको कार्यक्रममा व्यक्त विचारको सम्पादित अंश)

साभारः नागरिक खबर

सिस्ने अनलाइन

सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।