रुकुमपश्चिमको बाँफीकोट गाउँपालिका ७ मग्मा निवासी क्यान्सर रोगका विरामी शशिराम खत्रीलाई स्थानीयको अगुवाइमा साढे सात लाख रकम सहयोग गरिएको छ ।
स्थानीय बुद्धिजीवी चन्द्रप्रकाश खनालको अगुवाइमा देश बिदेशमा गरिएको आर्थिक संकलन अभियानअन्तर्गत सो रकम सहयोग गरिएको हो । गत दशैं यता मात्रै पाँच लाख ४४ हजार रुपैयाँ सहयोग संकलन गरिएको छ भने त्यसअघि स्थानीयवासीले दुइ लाख ११ हजार छ सय ५० रुपैयाँ सहयोग संकलन गरेका थिए ।
योसँगै खत्रीको उपचारकालागि सात लाख ५५ हजार छ सय ५० रुपैयाँ सहयोग हस्तान्तरण गरिएको छ । यसैबीच मग्गामा एक कार्यक्रमका बीच बिदेशमा रहेका नेपालीहरुले पठाएको सहयोग हस्तान्तरण गरिएको छ । दाङको घोराहीस्थित अम्बिकेश्वरी क्याम्पसका क्याम्पस प्रमुखसमेत रहनुभएका चन्द्रप्रकाश खनालको संयोजमा अमेरिका र कोरियामा रहेका नेपालीले सहयोग संकलन गरी पठाएको तीन लाख ९३ हजार पाँच सय रुपैयाँ सहयोग हस्तान्तरण गरिएको हो ।
अमेरिकामा रहेका उहाँका मग्मा निवासी गोपाल खनालले त्यहाँ रहेका नेपालीबाट सहयोग संकलन गरी दुइ लाख ७० हजार पाँच सय र कोरियामा रहेका मग्मावासी भाइ दिनेश खनालले त्यहाँबाट नेपालीबाट सहयोग संकलन गरी एक लाख २३ हजार तीन सय रुपैयाँ पठाउनुभएको हो ।
नेपाल राष्ट्रिय माध्यामिक विद्यालय मग्माका प्रअ हिरालाल खनालको अध्यक्षतामा र वडा अध्यक्ष नरबहादुर खत्रीको प्रमुख आतिथ्यमा भएको कार्यक्रममा स्थानीयबासी, जनप्रतिनिधि, शिक्षक बुद्धिजीवी, प्रहरी र पत्रकारको रोहवरमा सो रकम विरामी खत्रीलाई प्रदान गरिएको हो ।
कार्यक्रममा प्रमुख अतिथि खत्रीले गाउँका बासिन्दा धनका गरीब भए पनि मनका धनि भएको उल्लेख गर्दै देशभित्र र बाहिर रहेका गाउँबासीले यति ठूलो रकम सहयोग गर्नु सामाजिक भावनाको उदाहरणीय काम भएको बताउनुभयो । पत्रकार नरेन्द्र केसीले समाजमा थोरै मान्छेसँग सामाजिक मन हुने भए पनि सामाजिक मन भएकाहरुले अभियान थालेर सबैलाई मानवीय कार्यमा सहभागी बनाउनु चुनौतिसहितको महत्वपूर्ण काम भएको बताउनुभयो ।
सहयोग संकलन अभियानका पहलकर्ता चन्द्रप्रकाश खनालले गत दशैंमा आफू गाउँ आएको बेलामा शशिराम खत्रीलाई क्यान्सर भएको र आर्थिक अभावमा उपचार नपाएको थाहा पाएपछि आफूले व्यक्तिगतरुपमा ५७ हजार हजार सहयोग गरेर अभियानको थालनी गरेको बताउनुभयो । अचानोलाई खुकुरीको पीर थाहा हुन्छ भनेजस्तै आफूले क्यान्सरकै कारण आमा गुमाएकाले स्मरण गर्दै उहाँले गाउँका कोही पनि उपचार नपाएर मर्न नपरोस् भनेर अभियान थालिएको बताउनुभयो ।
कार्यक्रममा सिद्धार्थ मावि मग्मा प्रअ नदीराम केसी, प्लस टू संयोजक इन्द्रबहादुर खत्री, प्रहरी चौकी मग्मा इञ्चार्ज किरण गुरुङ, आधारभूत विद्यालय नदुवाका प्रअ खिबहादुर खत्रीलगायतको आतिथ्य रहेको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
