रुकुम पश्चिम मुसिकोट नगरपालिका वडा नं १० स्थित कामी बुढा पार्कमा परम्परागत पापिनी मेला तथा माघे संक्रान्तिको अवसरमा बिबिध कार्यक्रमसहित रचनात्मक मेला शुरु भएको छ ।
सहिद कामी बुढा–बिजय–छहरा युवा क्लबको आयोजनामा मेला शुरु भएको हो । मेलाको उद्घाटन वडा अध्यक्ष गोप्यश्वर केसीले गर्नुभयो ।
मेलामा पुरुष भलिबल महिला भलिबल, लोकदोहरी, रस्साकस्सी, सामूहिक नृत्य, एकल नृत्य, भाले तान्ने, घैटोफोर लगायतका प्रतियागिता शुरु गरिएको छ ।
त्यस्तै स्थानीय पैसरी नाच र ¥यारंगी नाच पनि प्रतियोगिताको रुपमा सञ्चालन गरिएको छ । माघ १ गतेसम्म सञ्चालन हुने मेलामा पुरुष भलिबलमा रुकुम पश्चिम रुकुम पुर्ब र रोल्पा गरि २१ टिमको सहभागी रहेको छ । पुरुष भलिबलमा प्रथमलाई २५ हजार, द्धितीयलाई २० हजार र तृतीयलाई १५ हजार पुरस्कार र प्रमाणपत्र दिइने छ ।
क्लबका हरिबहादुर कठायतको अध्यक्षता, वडा अध्यक्ष केसीको प्रमुख तथा सहिद कामी बुढाकी छोरी मोतिकला पुनको बिशिष्ठ आतिथ्यमा भएको कार्यक्रममा मुसीकोट वडा ९ का वडा अध्यक्ष नवीन ओली, स्थायी प्रहरी चौकी झुल्खेतका इन्चार्ज वीरबहादुर भण्डारीलगायतले बोल्नुभएको थियो ।
क्लबका निवर्तमान अध्यक्ष तपबहादुर कठायतको स्वागत मन्तब्यबाट शुरु भएको कार्यक्रम सञ्चालन सल्लाहकार लोकेन्द्र कठायतले गर्नुभएको थियो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
