नेपाल कम्युनिष्ट पार्टीका संघीय संसदीय दलका उपनेता तथा तत्कालीन संविधानसभाका अध्यक्ष सुवासचन्द्र नेम्बाङले नेपाल पत्रकार महासंघले मिडिया काउन्सिल विधेयक र सूचना प्रविधि विधेयकमा जनाएका विमति र राखेका मागहरुलाई पार्टीले सम्बोधन गर्ने बताएका छन् ।
महासंघका पदाधिकारीहरुसँग छलफलका क्रममा बोल्दै नेम्बाङले भने, ‘बुझाबुझको अभाव भयो । यहाँहरुको आन्दोलनकै सम्मान गरेर मिडिया काउन्सिल विधेयक ‘होल्ड’मा छ । यो कुरा यहाँहरुसम्म लैजान सकिएन छ । होल्ड भनेको स्थगित हो । संशोधनमार्फत तपाईंहरुले प्रेस तथा अभिव्यक्ति स्वतन्त्रताका लागि राखेका मागहरुलाई सम्बोधन गर्न म प्रतिवद्धता व्यक्त गर्दछु ।’
नेता नेम्बाङले आवश्यकताअनुसार छलफलबाट महासंघकै सुझाव र चाहनाअनुसार मिडिया काउन्सिल विधेयकमा संशोधन गरी पारित गरिने भन्दै त्यसका लागि आफूले पूर्ण भूमिका खेल्ने प्रतिवद्धता व्यक्त गरे । उनले महासंघलाई पूर्णरुपमा आश्वस्त हुन र आन्दोलन फिर्ता लिन आग्रह गरे । ‘कथंकदाचित त्यसो हुन सकेन भने फेरि डण्डा लिएर तपाईंहरु बसेकै हुनुहुन्छ ।’
त्यसअघि बोल्दै महासंघका अध्यक्ष गोविन्द आचार्यले महासंघले मिडिया काउन्सिल र सूचना प्रविधिसम्बन्धी विधेयकमा धारा, उपधाराहरुमा असहमतिका बुँदाहरु पहिले नै पेश गरिसकेको बताउँदै यी दुई विधेयक सैद्धान्तिकरुपमै नेकपाको राजनीतिक प्रतिवेदन, चुनावी घोषणापत्रमा रहेको प्रेस तथा अभिव्यक्ति स्वतन्त्रता र प्रचलित विश्वव्यापी मान्यता र प्रचलनकै विरुद्धमा रहेको बताए ।
उपाध्यक्ष विपुल पोख्रेलले सत्तापक्ष, प्रतिपक्ष तथा प्रमुख सबै पार्टीहरु संविधानप्रति प्रतिवद्ध रहेको र प्रेस तथा अभिव्यक्ति स्वतन्त्रताप्रति समान नीति रहेको उल्लेख गर्दै यी दुई विधेयकहरु नेकपाको घोषित नीतिकै पनि विरुद्धमा भएको बताए ।
महासचिव रमेश विष्टले महासंघको आन्दोलन व्यवस्था उल्टाउने, सरकार फाल्ने र कुनै व्यक्तिप्रति लक्ष्यित नभएको भन्दै संविधानले नै प्रत्याभूत गरेको प्रेस तथा अभिव्यक्ति स्वतन्त्रतालाई नियन्त्रण गर्न नहुनेतर्फ आफूहरुको आन्दोलन केन्द्रित रहेको स्पष्ट पारे ।
सैद्धान्तिकरुपमा सहमति भए तापनि महासंघले लिखित प्रतिवद्धताको माग गरेको थियो । त्यसपछि थप गृहकार्यसहित आइतबार पुनः छलफल गर्ने सहमति भएको छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
