घोराहीमा एक महिलाको शल्यक्रियाका लागि तीन व्यक्तिले रक्तदान गरेका छन् ।
तुलसीपुर उपमहानगरालिकाका १८ निवासी ४५ बर्षीया शोभा ओलीको उपचारका लागि धेरै रगत आवश्यक पर्ने भएकाले सामाजिक सञ्जालबाट रक्तदानका लागि आव्हान गरिएको थियो । सो आव्हानपछि ब्यवसायी होम यरी, कर्मचारी झंकार लामिछाने र पत्रकार निशानदाजु भट्टराइले रक्तदान गर्नुभएको हो ।
शुरुमा थोरै रगत आवश्यक परे पनि चढाउँदै जाँदा धेरै रगत लागेको र सबै रगत रक्तसञ्चार केन्द्रबाट संभव नहुने भएकाले रक्तदानका लागि सार्वजनिक आव्हान गरिएको विरामीका भाइ रविन केसीले जानकारी दिनुभयो । सो आव्हानपछि ताजा रगत प्राप्त भएको र विरामीको शल्यक्रियाका लागि सहज भएको उहाँले जानकारी दिनुभयो ।
रोल्पा होलेरीका ब्यवसायी यरी, राप्ती स्वास्थ्य विज्ञान प्रतिष्ठानका कर्मचारी लामिछाने र पत्रकार भट्टराइले सामाजिक सञ्जालमा गरिएको सहयोगको आग्रहपछि रक्तदान गरेको बताउनुभयो । पत्रकार भट्टराइले जन्मदिन पनि सोही रक्तदान गरेर मनाएको बताउनुभयो । पछिल्लो समयमा सामाजिक सञ्जालबाट रक्तदानका लागि प्रोत्साहित गर्ने गरिएको छ ।
अहिलेसम्म रक्तसञ्चार सेवा केन्द्र घोराहीले दुइ प्वाइन्ट रगत उपलब्ध गराइसकेको छ भने दाताहरुबाट प्राप्त समेत गरी रगत पुग्ने अवस्था रहेको केसीले जानकारी दिनुभयो । रक्तसञ्चार सेवा केन्द्र घोराही इञ्चार्ज दिलिप न्यौपानेले बी पोजिटिभ र ओ पोजिटिभ रगत कमी नै रहेकाले रक्तदान अझे बढाउनुपर्ने बताउनुभयो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
