रुकुमपूर्वको भूमे गाउँपालिका वडा नम्बर ९ चुनवाङले सामाजिक जागरणका लागि साझा अभियान सञ्चालन गरेको छ ।
वडा कार्यालयको योजनाअनुसार खानेपानी तथा सरफाइ वडा समितिको आयोजना तथा सामुदायिक प्रहरी साझेदारी कार्यक्रम, बहुक्षेत्रीय पोषण कार्यक्रम र रुकुमेली विकास संस्थाको सुहारा कार्यक्रमसँगको साझेदारीमा पूर्ण सरसफाइमा केन्द्रित सामाजिक जागरण अभियान थालिएको हो ।
वडाले गठन गरेको १८ वटा टोल विकास संस्थामा अभियान सञ्चालन गरिएको वडा अध्यक्ष प्रवेश पुन मगरले जानकारी दिनुभयो । ‘ऐतिहासिक चुनवाङ हाम्रो गौरव हाम्रो शानः सुन्दर, शान्त, हतियाली र समृद्धि हाम्रो अभियान’ भन्ने नाराका साथ अभियान सञ्चालन गरिउको हो ।
अभियानका क्रममा घरेलु हिंसा नियन्त्रण, बालविवाह तथा बहुविवाह रोक्ने दायित्व, करेसाबारी निर्माण, पोषण, सरसफाइलगायत विभिन्न पक्षमा सचेतनामूलक कार्यक्रम गरिएको र कार्यक्रममा हरेक घरपरिवारका सदस्यको सहभागिता रहेको अध्यक्ष पुनले जानकारी दिनुभयो ।
उहाँले वडाले भौतिक पूर्वाधार निर्माणसँगै सामाजिक सचेतना र उत्पादनका काम पनि शुरु गरेको जानकारी दिनुभयो ।
लसुनको पकेट क्षेत्र निर्माणका लागि अभियान थालेको वडाले लसुन, दालचिनीको पात, अलैची, धनियाँ र जिरासहितको ‘तीन बहिनी’ मसला उत्पादन शुरु गरेको जानकारी दिनुभयो ।
स्थानीय सरकारको सहयोगमा सहकारीबाट उत्पादन थालिएको हो । कृषि उत्पादन र पर्यटनलाई आर्थिक समृद्धिको आधार बनाइने उहाँले बताउनुभयो ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
