घोराही । घोराहीस्थित अम्बिकेश्वरी कलेज अफ टेक्नोलोजीद्वारा सञ्चालित नोभा नेशनल कलेजले बिएएलएलबी शैक्षिक कार्यक्रम सञ्चालनमा ल्याएको छ । कलेजले बिहीबार घोराहीमा पत्रकार सम्मेलनमार्फत बिएएलएलबी कार्यक्रम सञ्चालनमा ल्याएको जानकारी दिएको हो ।
कलेजका अध्यक्ष चन्द्रप्रकाश खनालले कार्यक्रमको बारेमा जानकारी दिँदै कानुन क्षेत्रको महत्त्वलाई मध्यनजर गर्दै घोराहीमा बिएएलएलबी शैक्षिक कार्यक्रम सञ्चालनमा ल्याएको बताए । उनले कलेज सञ्चालनसँगै पहिलो वर्ष ४० जनाको कोटामा भर्ना खुला गरिसकेको र बिएएलएलबी पाँच वर्षे शैक्षिक कार्यक्रम भएको उद्घोष गरे । यो पाँच वर्षे शैक्षिक कार्यक्रमका लागि पाँच लाख शुल्क निर्धारण गरिएको बिएएलएलबी स्नातक तहको आर्ट र कानुनको संयुक्त कोर्ष भएको उनले बताए । यो स्नातक तहको कार्यक्रम भएकोले जुनसुकै विषयमा ५० प्रतिशत वा सीप्लस ल्याएर १२ कक्षा उत्तीर्ण गरेका विद्यार्थीले कलेजले लिने प्रवेश परीक्षा उत्तीर्ण गरि भर्ना हुन पाउने व्यवस्था रहेको समेत उनले जानकारी दिए ।
कलेजले कानूनी ज्ञान र समाजशास्त्रलाई पाठ्यक्रममा समावेश गर्दै विद्यार्थीलाई एक सक्षम, न्यायप्रेमी र प्रभावशाली कानुनी व्यवसायी बनाउने लक्ष्य राखेको अध्यक्ष खनालको भनाइ छ । दाङमा प्लसटुतर्फ कानुन विषयको पढाइ भएतापनि स्नातकतर्फको पढाइ नहुँदा अधिकांश विद्यार्थीलाई काठमाडौं जानुपर्ने बाध्यता रहेको भन्दै उनले अबदेखि त्यो बाध्यता हटेको कुरामा जोड दिए । विद्यार्थीहरुका लागि विभिन्न आरक्षण कोटामा छात्रवृत्तिको समेत व्यवस्था गरिएको कलेज प्रशासनले जनाएको छ ।
कलेजका अध्यक्ष चन्द्रप्रकाश खनालको अध्यक्षता भएको कार्यक्रममा नेपाल पत्रकार महासंघ दाङका सल्लाहकार सुदीप गौतम, महासंघ दाङ शाखाका अध्यक्ष दुर्गालाल केसी, नोभा कलेजका संयोजक डा. केशव केसी, कलेजका प्राध्यापक सोगतबिर चौधरीलगायतले बिएएलएलबी शैक्षिक कार्यक्रम बारेमा आ-आफ्नो धारणा राखेका थिए ।
कार्यक्रमको सहजीकरण कलेजका प्राध्यापक वसन्तप्रसाद रिजालले गरेका थिए ।
यस्ता छन्, यसका अवसरहरु :
– बिएएलएलबी उत्तीर्ण गरेपछि विद्यार्थीले आफ्नो प्रोफेसनल जीवन निम्न क्षेत्रमा लगाउन सक्छन् ।
१. सरकारी जागिरमा कानुन अधिकृतको रुपमा सरकारी वकिल बन्न सकिन्छ ।
२. कानुनको अध्ययन तथा अनुसन्धान कार्यमा सक्रिय रहन सकिन्छ ।
३. विभिन्न संघसंस्था, वित्तीय संस्था तथा बैंकको कानुनी सल्लाहकारको रुपमा कार्य गर्न सकिन्छ ।
४. एनजीओ/ आइएनजिओ तथा अन्तरास्ट्रिय संघसंस्थामा काम गर्न सकिन्छ ।
५. प्राइभेट ल फर्ममा कानुनी व्यवसायी/ वकिलको रुपमा कार्य गर्न सकिन्छ ।
६. कानुनको उच्च शिक्षा एलएलएम अध्ययन गर्न सकिन्छ ।
७. माननीय न्यायाधीशको रुपमा आफ्नो भविष्य निर्माण गर्न समेत सकिन्छ ।
८. विश्वव्यापी रुपमा मानव अधिकारको क्षेत्रमा काम गर्न सकिन्छ ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
