दाङ जिल्ला क्रिकेट संघले पहिलो पटक आयोजना गर्न लागेको फ्रेन्चाइज क्रिकेट लिग ‘दाङ क्रिकेट लिग’का ५ वटै टिमका मालिकको टुंगो लागेको छ । चैत १२ गतेदेखि पहिलो पटक खेलाडीहरुको अक्सन गरेर आयोजना गर्न लागेको प्रतियोगितामा ५ टिमले सहभागीता जनाउँदै छन् । दाङमा क्रिकेटको सम्भावनालाई अझ ब्यापक बनाउने उद्देश्यले यो प्रतियोगिता आयोजना गर्न लागिएको जिल्ला अध्यक्ष प्रदीप मजगैंयाले जानकारी दिए । प्रतियोगिताका लागि पाँचौ तथा अन्तिम टिमको स्वामित्व लिनका लागि युवा व्यवासायी विनिल केसी आएका छन् । घोराहीमा हुने प्रतियोगिताका लागि अहिले मैदान निर्माणको काम चलिरहेको छ भने अब चाँडै नै खेलाडीको अक्सनको मिति तोक्ने तयारी गरिएको छ । यसैगरी नेपाली कांग्रेसका नेता तथा समाजसेवी जानकीलाल बस्नेतले पनि टिम लिएका छन् । उनले आफ्नै क्षेत्र देउखुरी वारियर्स नामक टिम लिएका हुन् ।
यस्तै घोराही टाइगर क्लब भने अविनाश जंग राणाले लिएका छन् । काठमाडौंको ठमेलमा रहेको प्लेब्वाए लाउन्जका सञ्चालक राणाले लिएका हुन् । उनी दाङका व्यवसायी तथा काठमाडौंको स्टार एफको संस्थापक बलिभद्र राणाको छोरा पनि हुन् ।
यसैगरी दंगाली लायन नामक फ्रेन्चाइज क्रिकेट क्लबको स्वामित्व दाङ कांग्रेसमा राम्रो प्रभावपार्ने नेता तथा व्यवसायी किरणकिशोर घिमिरले लिएका छन् । दाङको क्रिकेट विकासका लागि युवाहरु सक्रिए भएकाले टिम लिएर हौसला प्रदान गरेको घिमिरेको भनाई रहेको छ ।
यस्तै, प्रतियोगिताका लागि पहिलो टिम खरिदकर्ता भने पुरन्धारा क्रिकेट क्लब नै बनेको थियो । क्लबका अध्यक्ष बालकृष्ण खत्रीले सुरुमै पुरन्धारा च्यालेन्जर्स लिएका थिए ।
पहिलो पटक प्रतियोगिता आयोजना गर्न लागिएकोले प्रायोजकहरुको समस्या परेको भन्दै क्रिकेटलाई माया गर्नेहरुबाट थोरै थोरै भए पनि आर्थिक सहयोग उठाएर प्रतियोगिता आयोजना हुन लागेको छ । स्वदेश तथा विदेशमा बस्नेहरुबाट अहिले नियमति रुपमा आर्थिक संकलन भएको अध्यक्ष मजगैंयाले बताए । प्रतियोगिताका लागि नेपाल क्रिकेट संघ क्यानको कार्यसमिति देखि विभिन्न समयमा राष्ट्रिय अन्तर्राष्ट्रिय प्रतियोगिता खेलेका खेलाडीहरुले पनि साथ दिएका छन् । २०४२ सालमै तत्कालिन राप्ती अञ्चलबाट प्रतिनिधित्व गर्दै प्रतियोगिता खेलेका उपेन्द्र भट्टराईदेखि क्यानका पूर्व सहसचिव तथा अन्तर्राष्ट्रिय खेलाडी किरण शमसेर राणा, दाङका पूर्व खेलाडी लगायतले सहयोग गरेका छन् । लुम्बिनी प्रदेशका अध्यक्ष दुर्गा थापा देखि विभिन्न जिल्ला अध्यक्ष हएउको राम्रो साथ दाङ्ले पाएको छ । यसैगरी नेपाल क्रिकेट संघ क्यानका कार्यबहाक सचिव प्रशान्त मल्लले प्रतियोगिताको सर्वाधिक रन स्कोररलाई दिइने नगद पुरस्कारको प्रायोजन गरेका छन् । यसैगरी केन्द्रीय सदस्य दुर्गाराज पाठकले प्रतियोगिताको उत्कृष्ट बलरलाई प्रदान गर्ने रकमको प्रायोजन गरेका छन् । हस्पिटालीटि पार्टनरको रुपमा भिंग्रेली रिसोर्ट रहेको छ भने किसान ट्रेडिङ कन्सर्न–इसुजुले गोल्ड स्पोन्सर गरेको छ ।

सिस्ने अनलाइन

सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।