घोराही । गुरुकुल एकेडेमी घोराहीको ११औँ वार्षिक उत्सव विविध कार्यक्रमसहित भव्य रूपमा सम्पन्न भएको छ। शिक्षा, संस्कार र समग्र व्यक्तित्व विकासलाई केन्द्रमा राख्दै आयोजना गरिएको उक्त उत्सवमा विद्यार्थी, अभिभावक, शिक्षक तथा समाजका विशिष्ट व्यक्तिहरूको उल्लेखनीय सहभागिता रहेको थियो। 
गुरुकुल एकेडेमी घोराहीका प्रधानाध्यापक प्रदीप राजभण्डारी अध्यक्षतामा भएको कार्यक्रममा नेपाल संस्कृत विश्वविद्यालयका उपकुलपति प्रा।डा। धनेश्वर नेपाल प्रमुख अतिथि रहनुभएको थियो। प्रमुख अतिथि प्रा।डा। नेपालले गुरुकुल शिक्षाको महत्व, संस्कृत शिक्षाको वर्तमान अवस्था र भावी पुस्ता निर्माणमा विद्यालयको भूमिकाबारे चर्चा गर्दै गुरुकुल एकेडेमीले शिक्षासँगै संस्कार र अनुशासनमा दिएको योगदान प्रशंसनीय रहेको बताउनुभयो।
कार्यक्रममा विशिष्ट अतिथिका रूपमा नेपाल पत्रकार महासंघका केन्द्रीय सचिव सविन प्रियासन, राप्तिपोष्ट राष्ट्रिय दैनिकका प्रकाशक तथा सम्पादक सरद अधिकारी, नेपाल पत्रकार महासंघ दाङका अध्यक्ष सन्तोष सुबेदी तथा अभिभावकको तर्फबाट तिर्था पौडेलले शुभकामना मन्तव्य राख्नुभएको थियो। वक्ताहरूले गुरुकुल एकेडेमीले शैक्षिक क्षेत्रमा पु¥याउँदै आएको योगदान, विद्यार्थीमैत्री वातावरण र गुणस्तरीय शिक्षाप्रति विद्यालयको प्रतिबद्धताको खुलेर प्रशंसा गर्नुभयो। यस्तै, विद्यालयका निवर्तमान प्रधानाध्यापक डा। कृष्णराज डिसीले धन्यबाद मन्तव्य राख्दै विद्यालयको यात्रामा साथ दिने शिक्षक, कर्मचारी, अभिभावक तथा शुभेच्छुकप्रति आभार व्यक्त गर्नुभयो। उहाँले गुरुकुल एकेडेमीले आगामी दिनमा अझ सशक्त शैक्षिक पहिचान बनाउने विश्वास व्यक्त गर्नुभयो।
बार्षिकउत्सवका अवसरमा विद्यालयकी नर्स सुस्मिता भुषालद्वारा विद्यार्थी तथा अभिभावकहरूको सामान्य स्वास्थ्य परीक्षणसमेत गरिएको थियो, जसले कार्यक्रमलाई थप उपयोगी र सेवामूलक बनाएको थियो। कार्यक्रममा १० वर्षसम्म निरन्तर सेवा प्रदान गरेका शिक्षक तथा कर्मचारीहरू र उत्कृष्ट नतिजा हासिल गर्न महत्वपूर्ण भूमिका निर्वाह गर्ने शिक्षकहरूलाई नगदसहित सम्मान गरिएको थियो। सम्मानित हुने शिक्षकहरूमा अंग्रेजी विषयका शिक्षक जितबहादुर भण्डारी र राजन अधिकारी, नेपाली विषयका शिक्षक विवेक देवकोटा तथा डा। कृष्णराज डिसी रहनुभएको थियो। यस्तै, १० वर्षसम्म कार्यरत शिक्षक तथा कर्मचारीहरूमा शान्ता बस्नेत, शान्ता आचार्य, सागर आचार्य, पुष्पा चौधरी, खिमु केसी लगायतलाई सम्मान गरिएको थियो।
यसका साथै विभिन्न विधामा उत्कृष्ट प्रदर्शन गर्ने विद्यार्थीहरूलाई पनि सम्मान तथा पुरस्कृत गरिएको थियो, जसले विद्यार्थीहरूमा थप हौसला र प्रेरणा थपेको थियो। वार्षिक उत्सवकै अवसरमा विद्यालयका शिक्षक र पत्रकारबीच सम्पन्न मैत्रीपूर्ण भलिबल प्रतियोगितामा विजयी बनेको पत्रकार समूहलाई शिल्ड, मेडल र प्रमाणपत्र प्रदान गरी सम्मान गरिएको थियो। विद्यालयका सह–प्रधानाध्यापक महेन्द्र पौडेलको स्वागत मन्तव्यबाट सुरु भएको कार्यक्रमको सहजीकरण शिक्षक विवेक देवकोटा तथा विद्यार्थीहरू वर्षा खाती र ऋतु थापाले गर्नुभएको थियो।
कार्यक्रम भरि विद्यार्थीहरूको प्रस्तुतिले उत्सवलाई थप आकर्षक र जीवन्त बनाएको थियो। समग्रमा गुरुकुल एकेडेमी घोराहीको ११औँ वार्षिक उत्सव शैक्षिक उपलब्धि, सम्मान, स्वास्थ्य सेवा र सामाजिक सद्भावको सन्देशसहित सफलतापूर्वक सम्पन्न भएको विद्यालयले जनाएको छ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
