बंगलाचुली । दाङको बंगलाचुलीमा छैठौं बंगलाचुली कप खेलकूद प्रतियोगिता सञ्चालन हुने भएको छ । बंगलाचुली गाउँपालिकाको आयोजनामा आगामी मंसिर सात गतेदेखि प्रतियोगिता सञ्चालन हुने भएको हो ।
बंगलाचुली गाउँपालिकाका शिक्षा अधिकृत ओम प्रकाश केसीले सोमबार एक सूचना जारी गर्दै गाउँपालिकाको आर्थिक वर्ष २०८२/०८३ को वार्षिक कार्यक्रम अनुसार पालिकाको आयोजनामा छैठौं बंगलाचुली कप मंसिर सात र आठ गते दुई दिनसम्म सञ्चालन हुने जानकारी दिनुभएको छ । दुई दिनसम्म सञ्चालन हुने प्रतियोगितामा विभिन्न विधाका खेलहरु हुने भएका छन् । प्रतियोगितामा भलिबलतर्फ पुरुष तथा महिला दुबै खेलहरु हुनेछन् भने क्रिकेटतर्फ पुरुष खेल मात्र हुनेभएको छ ।
प्रतियोगितामा पालिकाभित्रका आठ वटै वडाहरुबाट एक समूह पर्नेगरी सहभागी पठाइदिनका लागि अनुरोध गरिएको छ । प्रतियोगितामा सहभागी हुनका लागि आगामी मंसिर चार गते दिउँसो एक बजे समूह दर्ता गरिसक्नुपर्ने र मंसिर पाँच गते दिउँसो टाइ सिट प्रकाशन गरिने भएको छ । बंगालचुली–४ मा रहेको गढीलेख खेल मैदान खेलकूद प्रतियोगिता सञ्चालन हुनेछ ।
प्रतियोगिताका लागि प्रत्येक वडाबाट प्रत्येक विधामा एक टिम मात्र सहभागी हुन पाउने, बंगलाचुली गाउँपालिका अन्तर्गतका वडाहरुबीच प्रतिस्पर्धा हुने, खेल सञ्चालन मंसिर सात गते बिहान आठ बजेदेखि हुने र सम्बन्धित खेलाडीहरु सो समय अगाबै खेल हुने स्थानमा उपस्थित हुनेगरी आफ्नो व्यवस्थापन गर्नुपर्ने र सम्बन्धित वडाको नागरिक हुनुपर्ने छ ।
त्यस्तै खेलाडीहरुको नामसहितको वडाको सिफारिस र सम्बन्धित नगारिक खुल्ने कागजात टिम दर्ता हुनुपर्ने छ । प्रतियोगितामा भलिबलतर्फ प्रथम, द्वितीय, तृतीय हुने खेलाडीहरुले क्रमशः २६ हजार, १६ हजार र नौ हजार नगद पुरस्कारसहित शिल्ड, मेडल र प्रमाणपत्र प्राप्त गर्नेछन् । त्यस्तै क्रिकेटतर्फ विजेता र उपविजेता हुने टिमले क्रमशः ३० हजार र १८ हजार नगद पुरस्कारसहित शिल्ड, मेडल र प्रमाणपत्र पाउने छन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
