दाङ । नेपाली म्युजिक भिडियो क्षेत्रमा पछिल्ला दिनमा नायक पल शाह र मोडेल नारायणी खत्रीको जोडी विशेष रूपमा ध्यानाकर्षणको केन्द्र बनेको छ। छोटो अवधिमा सार्वजनिक भएका निरन्तर भिडियोहरूले यी दुईलाई दर्शकको मनमा सफल जोडीका रूपमा स्थापित गरिरहेका छन्।
संगीत बजारमा तीव्र प्रतिस्पर्धा बीच पनि यी कलाकारहरूले आफ्नो पृथक् पहिचान बनाउन सकेका छन्। उनीहरू प्रस्तुत भएका लोकप्रिय भिडियोहरू — “करिमैले पो के गर्छ काइला”, “कान्छी मायाको गाला पुक्क पुक्क”, “म भन्दा राम्रो कोही”, “मान्छे म त अच्छा लेकिन”, “मायालु कै नाउमा”, “तारेमाम तारेमाम” र “नचिदे सैया दनादन” — ले दर्शकको मन जितेका छन्।
लोक तथा आधुनिक दुवै शैलीमा समान निपुणता देखाउने यी कलाकारहरूको सहकार्यले नेपाली म्युजिक भिडियोको स्तरमा नयापन ल्याएको अनुभव गरिएको छ। पल शाहको परिपक्व अभिनय र नारायणी खत्रीको आत्मविश्वासी उपस्थितिले पर्दामा सन्तुलित सौन्दर्य प्रस्तुत गरेको छ। उनीहरूबीचको भावनात्मक तालमेल र सहज समन्वयले भिडियोहरूलाई जीवन्त र प्रभावशाली बनाएको छ।
डिजिटल पहुँच बढ्दै जाँदा युट्युबजस्ता प्लेटफर्महरू नेपाली मनोरञ्जनको प्रमुख माध्यम बनेका छन्। यही परिवेशमा पल–नारायणी जोडीले दर्शकको रुचि अनुसारका सन्तुलित र आकर्षक प्रस्तुति दिन सफल देखिन्छ।
म्युजिक भिडियोसँगै देश तथा विदेशमा आयोजना हुने विभिन्न सांस्कृतिक कार्यक्रममा समेत यो जोडीको उपस्थिति देखिन थालेको छ। नयाँ ऊर्जा, समर्पण र अभिनय कौशलका साथ अघि बढिरहेको यो जोडीले आगामी दिनमा नेपाली संगीत उद्योगमा थप रौनक भर्ने विश्वास गर्न सकिन्छ।
फोटोग्राफीमा दक्ष महरा सिस्ने अनलाइनका फोटो पत्रकार हुनुहुन्छ ।
