तुलसीपुर । गुरुकुल एकेडेमी तुलसीपुरले एक विशेष कार्यक्रम ‘विद्यार्थीसँग मेयर’ को आयोजना गरेको छ। कार्यक्रमका प्रमुख अतिथि तुलसीपुर उपमहानगरपालिकाका मेयर टिकाराम खड्का रहनुभएको थियो।
विद्यालयका विद्यार्थी तथा अभिभावकहरूका लागि यो कार्यक्रम एक महत्त्वपूर्ण अवसर बन्न पुगेको थियो। यस अवसरमा मेयर खड्काले विद्यार्थीहरूसँग संवाद गर्दै उनीहरूको शैक्षिक अवस्थाका बारेमा चर्चा गर्नुभयो। साथै, भविष्यमा गरिने विभिन्न पहलहरूको बारेमा जानकारी दिनुका साथै विद्यार्थीहरूलाई मार्गदर्शन गर्नुभयो।
कार्यक्रममा गुरुकुल एकेडेमी तुलसीपुरका प्रधानाध्यापक मुकुन्द गिरीले विद्यालयको शैक्षिक वातावरण र विद्यार्थीहरूसँगको सम्बन्धका विषयमा आफ्ना विचार व्यक्त गर्नुभयो। उहाँले मेयरको उपस्थितिलाई महत्त्वपूर्ण मान्नुपर्ने उल्लेख गर्दै, कार्यक्रमले विद्यार्थीहरूको सामाजिक तथा शैक्षिक विकासमा नयाँ दिशा दिने विश्वास व्यक्त गर्नुभयो।
कार्यक्रमको अध्यक्षता प्रधानाध्यापक गिरीले गर्नुभएको थियो भने सहजीकरण विद्यालयका सह–प्रधानाध्यापक ज्ञानेन्द्र बुढाले गर्नुभएको थियो। सह–प्रधानाध्यापक बुढाले विद्यार्थीहरूको प्रश्नहरूको उत्तर दिने क्रममा उनीहरूका शैक्षिक तथा सामाजिक समस्याहरू समाधान गर्ने प्रतिबद्धता व्यक्त गर्नुभयो।
यस कार्यक्रमले विद्यार्थीहरूलाई मेयरसँग प्रत्यक्ष संवाद गर्न र आफ्ना चासोका विषयमा जानकारी हासिल गर्ने अवसर प्रदान गरेको छ। मेयर खड्काले विद्यार्थीहरूलाई आफ्नो भविष्य निर्माणका लागि मेहनत, समर्पण र लगनशीलताका साथ अघि बढ्न प्रेरित गर्दै, स्थानीय सरकारको पूर्ण सहयोग रहने विश्वास दिलाउनुभयो।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
