भालुबाङ । दाङको राप्ती गाउँपालिका–१ शान्तपुर र अर्घाखाँचीको सितगङ्गा नगरपालिका–८ बेलौते बडीदमार जोड्ने मोटर बाटोको विवाद समाधानका लागि मंगलबार स्थलगत अवलोकन गरिएको छ।
दाङका प्रमुख जिल्ला अधिकारी कृष्णप्रसाद लम्साल, राप्ती गाउँपालिकाका अध्यक्ष प्रकाश विष्ट लगायतको टोलीले उक्त बाटोको अनुगमन गरेको हो।
राप्ती नदीमा पक्की पुल निर्माण भएसँगै केही व्यक्तिहरूको जग्गा बाटोमा पर्ने भन्दै विवाद उत्पन्न हुँदै आएको छ।
अनुगमनपछि प्रमुख जिल्ला अधिकारी लम्सालले अन्य वैकल्पिक बाटोको व्यवस्था नभएसम्म हाल सञ्चालनमा रहेको बाटोलाई निरन्तरता दिन आग्रह गर्नुभयो। साथै, उहाँले बाटो र जग्गाको अवस्थाबारे एकीन गर्न नापीका कर्मचारी खटाइने बताउनुभयो।
राप्ती गाउँपालिकाका अध्यक्ष प्रकाश विष्टले हाल सञ्चालनमा रहेको बाटोका कारण जग्गाधनीहरूलाई मर्का पर्ने अवस्थामा वैकल्पिक बाटो निर्माणका लागि पहल गर्ने बताउनुभयो।
यसअघि पनि जनप्रतिनिधि र स्थानीयवासीहरूको उपस्थितिमा उक्त विषयमा छलफल भएको थियो।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो ।
