घोराही । नेपाल कम्युनिस्ट पार्टी निकट युवा संगठन नेपाल र अखिल (क्रान्तिकारी) पूर्वी दाङले संयुक्त रुपमा इजरायलमा ज्यान गुमाएका विद्यार्थीहरुको सम्झना दीप प्रज्वलन गरेको छ ।

इजरायल र प्यालेस्टाइनबीच भएको युद्धमा परी नेपाली १० जना नेपाली विद्यार्थीहरुले ज्यान गुमाएको सम्झनामा  संगठनले  संयुक्त रुपमा  मंगलबार घोराहीको तुलसीपुर चोकमा दीप प्रज्वलन गरेको कार्यक्रम सम्पन्न गरेको हो ।

कार्यक्रममा बोल्दै युवा संगठन नेपालका केन्द्रीय अध्यक्ष पाटन सीले इजरायल र प्यालेस्टाइनबीचको  युद्धमा परी  नेपाली विद्यार्थीहरुले ज्यान गुमाउनु निकै दुःखद् भएको भन्दै दिवंगत  विद्यार्थीहरुको सम्झना संगठनले देशभर विभिन्न ठाउँमा दीप प्रज्वलन गरिरहेको बताए ।  उनले युद्धको चपेटामा परी १० नेपाली विद्यार्थीहरुले ज्यान गुमाउनुमा साम्राज्यवाद र पूँजीवादको मुख्य हात रहेको समेत उद्घोष गरे   ।

युवा नेता पाटनले  साम्राज्यवादले विश्वामा थोपारेको युद्धका कारण नेपालका विभिन्न विश्वविद्यालयबाट पढ्न र ज्ञान आर्जन गर्न इजरायल पुगेका नेपाली विद्यार्थीहरुले ज्यान गुमाउनु हाम्रो र नेपालीका लागि दुःखद् घटना भएको  धारणा राखे ।  उनले विश्व तथा नेपालमा शान्ति  स्थापना गर्न र नेपाललाई समृद्धि बनाउन विश्वमा नयाँ व्यवस्था, नयाँ आदर्श, नयाँ संस्कार-संस्कृति  चाहिएको भन्दै त्यसका लागि विश्व मानवले सोच्नुपर्ने र विश्वका सचेत मान्छेहरुले सोचिरहेको बताए । नेपालबाट रोजगारको शिलशीलामा  विश्वका विभिन्न क्षेत्रमा रहेका नेपालीहरु पीडित तथा आक्रमणमा पर्ने सम्भावना र ज्यान गुमाउने लगायतका विभिन्न  खतरा रहेको र त्योबाट मुक्त हुन नेपाल सरकारले ध्यान दिनुपर्ने उनको भनाइ छ ।

अध्यक्ष पाटनले  सरकारले सकेसम्म विश्वमा अहिले लडाइ चलिरहेका देशहरूबाट नेपालीहरूलाई छिटोभन्दा छिटो नेपाल ल्याउन विश्व समुदायसँग कुटनीतिक पहल गर्न  अपील गर्दै सरकारलाई  ध्यानाकर्षण   गराएका थिए । कार्यक्रममा नेपाल कम्युनिस्ट पार्टी पूर्वी दाङका सेक्रेटरी जनक सी, पार्टी नेता, युवा तथा विद्यार्थीहरुको उपस्थिति रहेको थियो ।