घोराही, २७ माघ । नेपाल परिवार नियोजन संघ दाङ शाखाले जापानीज दूतावासको आर्थिक सहयोगमा निर्मित गरेको प्रसुति भवनको उद्घाटन गरेको छ ।
संघले आज शुक्रबार एक कार्यक्रमको आयोजना गरी उक्त भवनको उद्घाटन गरेको हो ।
लुम्बिनी प्रदेशका मन्त्री चेतनारायण आचार्यले ६७ वर्षदेखि नेपाल र जापानबीच औपचारिक रुपमा दोयत्त सम्बन्ध कायम गरेर अगाडि बढिरहेको बताए । 
कार्यक्रमका प्रमुख अतिथि समेत रहेका मन्त्री आचार्यले जापान सरकारले नेपालको स्वास्थ्य क्षेत्र, शिक्षा क्षेत्र र भौतिक पूर्वाधारको क्षेत्रमा सहयोग गर्दै आएको भन्दै लुम्बिनी प्रदेशको तर्फबाट जापान सरकारलाई धन्यवाद व्यक्त दिए ।
आगामी दिनमा हामीबीच भएको यो दोयत्त सम्बन्धलाई अझै प्रगाढ बनाउदै जानुपर्ने अपेक्षा गर्दै मन्त्री आचार्यले बिगतदेखि जापान सरकारले नेपाललाई गर्दै आएको यो सहयोगलाई अझै निरन्तरता दिन आग्रह समेत आग्रह गरे । जापानको सहयोगमा निर्माण भएको यो प्रसुति भवनले आम दाङबासीलाई सेवा प्रवाह गर्ने र यो सेवालाई थप प्रभावकारी बनाउनका निमित्त साथ, सहयोग र सहकार्य गर्न प्रदेश सरकार तयार रहेको मन्त्री आचार्यको भनाइ थियो ।
त्यसैगरी कार्यक्रमका विशिष्ट अतिथि महामहिम जापानी राजदुत किकुता युतकाले एसियाको प्रसिद्ध उपत्यका दाङमा आउन पाउँदा आफू निकै खुसी भएको बताए ।
निर्मित भवनको उद्घाटन गर्दै राजदुत युतकाले बच्चाहरुलाई सुरक्षीत स्थान राख्न र आमाहरुको स्वास्थ्यमा सुरक्षा गर्न दाङमा यो प्रसुती भवन संचालनमा आएको उद्घोष गरे ।
यो गतिविधिले भविष्यका कर्णधार बालबालिका तथा पुनर्जन्म दिने आमाहरूको सुविधाको लागि मात्र नभइ स्थानीयस्तरका समुदायलाई समेत योगदान पुग्ने राजदुत युतकाको भनाइ थियो ।
संस्थाका महानिर्देशक डा. नरेशप्रताप केसीले संस्थाबाट हुने सेवाको बारेमा प्रकाश पार्दै परिवार नियोजन संस्था एउटा भोलिएन्टेर रुपमा काम गर्दै आएको बताए । उनले जापानी सहयोग मध्ये ८० लाखमा भवन निर्माण भएको र २० लाख रुपैयाँले उपकरण खरिद गरेर सेवा विस्तार गरेको उद्घोष गरे । २०३४ सालमा स्थापना भएको यो संस्थाले आफ्नो सेवा प्रवाह गर्दै आइरहेको र यो संस्था स्थापना भएदेखि यहाँको बालबालिकाको मृत्युदर कम हुँदै गएको उनको भनाइ थियो ।
कार्यक्रममा शुभकामना मन्तव्य दिँदै विशिष्ट अतिथि लुम्बिनी प्रदेश सभाका सदस्य प्रचण्ड बिक्रम न्यौपानेले नेपाल र जापानीबीच पुरानो सम्बन्ध रहेको बताए । उनले जापानले नेपाललाई निस्वार्थ रुपमा सहयोग गर्दै आइरहेको र देश बन्नका लागि राजनीतिमा स्थायित्व हुनुपर्ने कुरामा जोड दिए ।
नेपाल परिवार नियोजनका केन्द्रीय अध्यक्ष हिमालयलाल कसजुले २०१९ सालमा दाङमा प्रसुति भवन बनाउने सम्झौता भएतापनि कोभिडका कारणले समयमै सम्पन्न गर्न नसकिएको बताए । उनले संस्था स्थापना भएको ६३ वर्षको लामो समयको उतारचढावका बीचमा पनि निरन्तर स्वास्थ्य सेवा प्रवाह गर्दै आइरहेको स्मरण गराउदै आगामी दिनमा पनि जानानको थप सहयोग हुने अपेक्षा व्यक्त गरे ।
जिल्ला समन्वय समिति दाङका प्रमुख नित्यानन्द शर्मा, जिल्ला प्रशासन कार्यालय दाङका प्रजिअ सुशील वैद्य लगायतले शुभकामना मन्तव्य व्यक्त गरेका थिए ।
नेपाल परिवार नियोजन संघका केन्द्रीय अध्यक्ष हिमालयलाल कसजुको अध्यक्षता एवं लुम्बिनी प्रदेशका मन्त्री चेतनारायण आचार्यको प्रमुख अतिथि तथा महामहिम जापानी राजदुत किकुता युतकाको विशिष्ट आतिथ्यतामा कार्यक्रम भएको थियो ।
संघका दाङ शाखाका सभापति तिर्थराज सन्तोषीको स्वागत मन्तव्यबाट सुरुभएको कार्यक्रमको सहजीकरण संघको सचिव माया पोख्रेलले गरेकी थिइन् ।
सिस्ने पश्चिम नेपालको एउटा हिमाल हो । हिमालजस्तै दृढ भएर डिजिटल पत्रकारितालाई अगाडि बढाउन हामीले यो नाम रोज्यौं । हिमालजस्तै दृढ भएर अघि बढ्न संकल्प गर्ने यो हाम्रो सानो प्रयास हो।
